AQSh Memlekettik hatshysy Maıkl Pompeonyń shaqyrýymen Syrtqy ister mınıstri Qaırat Ábdirahmanov Dinı senim bostandyǵyn nasıhattaý jónindegi birinshi konferensııaǵa qatysý maqsatynda Vashıngton qalasyna bardy, dep habarlady SIM baspasóz qyzmeti.
Q.Ábdirahmanov AQSh Memlekettik departamentiniń basshylyǵymen, sonyń ishinde Memlekettik hatshynyń birinshi orynbasary Djon Sallıvan jáne toqsanynshy jyldardyń ekinshi jartysynda AQSh senatory retinde Jibek joly strategııasy formatynda yntymaqtastyqty damytýǵa qatysty bastama kótergen, Dinı bostandyq jónindegi elshisi Sem Braýnbektiń qatysýymen birqatar kezdesý ótkizdi.
Dıplomattar Qazaqstan – AQSh qatynastary joǵary qarqynmen damyp otyrǵanyn, sondaı-aq Prezıdent Nursultan Nazarbaevtyń 2018 jylǵy qańtardaǵy Vashıngtonǵa jasaǵan resmı saparynyń qorytyndysy boıynsha qol jetkizilgen ýaǵdalastyqtardyń júzege asyrylý barysyn atap ótti. Taraptar Qazaqstan men AQSh arasyndaǵy saıası jáne saýda-ekonomıkalyq yntymaqtastyqty keńeıtýge erekshe nazar aýdardy.
Q.Ábdirahmanov amerıkandyq jetekshi kompanııalar men korporasııalardyń basshylyǵymen kezdesip, olardy Qazaqstanda búgingi bıznes júrgizýge jasalyp jatqan jańa qolaıly jaǵdaılarmen tanystyrdy. Kelisimderdiń joǵary deńgeıde, Qazaqstan jáne AQSh Prezıdentteri arasynda tabysty júzege asyrylýy arqasynda, iskerlik belsendiliktiń, sonymen qatar Qazaqstan ekonomıkasyna amerıkandyq ınvestısııalardyń kelýiniń artqany atap ótildi.
Mınıstr Memleket basshysynyń júrgizip otyrǵan qazaqstandyq ekonomıkany ártaraptandyrý saıasatyn eskere otyryp, iri joǵary tehnologııalyq jobalardy iske asyrý úshin, onyń ishinde óńdeý ónerkásibi, kólik ınfraqurylymy, aýyl sharýashylyǵy, baılanys jáne IT-tehnologııalardy damytý salalarynda amerıkalyq tájirıbe men kapıtaldy aýqymdy túrde tartýǵa Qazaqstan qyzyǵýshylyq tanytyp otyrǵanyna nazar aýdardy. Osy jáne basqa da kóptegen jobalar qazaqstandyq resmı tulǵalardyń AQSh-qa jáne amerıkalyq saýda mıssııalarynyń Qazaqstanǵa jasaıtyn aldaǵy saparlary barysynda ázirlenip, iske asyrylatyn bolady.