Ortalyq kommýnıkasııalar qyzmetinde Qazaqstannyń «Balalar Evrovıdenıesine» (Junior Eurovision Song Contest) qatysýyna arnalǵan baspasóz konferensııa ótti.
2018 jylǵy 25 qarashada Mınskte «Evrovıdenıeniń» analogy - «Junior Eurovision Song Contest» halyqaralyq án baıqaýy ótedi, oǵan 9 jastan bastap 14 jasqa deıingi oryndaýshylar qatysady. Qazaqstan baıqaýdyń 15 jyldyń tarıhynda alǵash ret qatysqaly otyr. Qazaqstannyń aýmaǵynda baıqaýdy «Habar» telearnasy kórsetedi. «Habar» Agenttigi 2016 jylǵy 1 qańtardan bastap Eýropalyq habar taratý odaǵynyń (EBU) qaýymdasqan múshesi bolyp tabylady, osy múshelik atalǵan baıqaýǵa qatysý úshin elden úmitker usynýǵa yqpal etti.
«Habar» Agenttiginiń Basqarma Tóraǵasy Alan Ajıbaev: «Qazaqstannyń qatysýy jónindegi kelissózder uzaq ýaqyt júrgizilip keldi, «EBU» sheshimi sońǵy sátke deıin belgisiz bolatyn. «Habar» «EBU» qaýymdasqan múshesi bolyp tabylatyndyǵyna qaramastan, osy tektes aýqymdy halyqaralyq is-sharalardy tehnıkalyq jabdyqtaý, televızııalyq toltyrý jáne translıasııalaý tájirıbesi boıynsha belgili bir talaptarǵa sáıkes kelýi qajet boldy. Osy ataqty baıqaýǵa elimizdiń qatysý múmkindigi paıda bolǵanyna qýanyshtymyz. Qazirgi sátte bizdiń Agenttik pen QR Aqparat jáne kommýnıkasııalar mınıstrligi bizdiń elde irikteý júrgizýdiń birneshe nusqasyn qarastyrýda, árbir talantty balanyń qatysýǵa múmkindigi bolýy úshin barynsha ońtaıly nusqa oılastyrylýda. Bári jaqyn arada aıtylatyn bolady».
Shart boıynsha baıqaýǵa qatysýshylar jańa, esh jerde jarııalanbaǵan án oryndaýy, sondaı-aq uzaqtyǵy 2 mınýt 45 sekýndtan bastap 3 mınýtqa deıingi óz kompozısııasyn jandy daýyspen aıtýy qajet. Jeńimpaz telekórermenderdiń jáne quramyna 5 adam (úsh eresek jáne eki bala) kiretin, barlyq qatysýshy elderden quralǵan qazylar alqasynyń daýys berýi jolymen anyqtalady. «Evrovıdenıeden» ereksheligi – balalar baıqaýynda jeńimpaz el avtomatty túrde kelesi baıqaýdy óz elinde ótkizý quqyǵyn ıelenbeıdi, bul jas qatysýshylarǵa qysymdy azaıtý úshin jasaldy. Baıqaýlardyń uıymdastyrýshylaryn Eýropalyq habar taratý odaǵy aldyn-ala anyqtaıdy. Bıyl baıqaýǵa 19 el qatysady, bul baıqaý ótkizýdiń búkil tarıhynda rekordqa aınalyp otyr. 19 eldiń qatarynda Albanııa, Armenııa, Avstralııa, Ázirbaıjan, Belarýs, Fransııa, Makedonııa, Grýzııa, Irlandııa, Izraıl, Italııa, Qazaqstan, Malta, Polsha, Portýgalııa, Reseı, Serbııa, Nıderlandy, Ýels bar. Qazaqstan men Ýels úshin bıylǵy qatysý debıýtti bolmaq.
«Junior Eurovision Song Contest» alǵash ret 2003 jyly Kopengagende (Danııa) 16 eldiń qatysýshysy arasynda ótti. Telekórermender men qazylar alqasynyń jeńimpazdy birlesip anyqtaýy 2008 jyldan bastap múmkin bola bastady. Oǵan deıin kórermender translıasııa kezinde daýys beretin. 2007 jáne 2008 jyldardyń baıqaýlarynda teledaýys berýden túsken paıda «UNICEF» berilgen bolatyn. Ár jyldary Belgııa, Rýmynııa, Nıderlandy, Kıpr, Ýkraına jáne t.b. uıymdastyrýshylar boldy. Reseı, Grýzııa, Belarýs jáne Malta 2 retten jeńdi. 2017 jylǵy «Junior Eurovision Song Contest» Tbılısıde ótti. О́tken jylǵy baıqaýdyń jeńimpazy – Reseıdiń 15 jastaǵy qatysýshysy Polına Bogýsevıch, ol «Wings» ánin oryndady.