Ataqty pıanıst, Qazaqstannyń halyq ártisi, Memlekettik syılyqtyń laýreaty Jánııa Áýbákirova ákesiniń kindik qany tamǵan Shet aýdanyna keldi. Mýzykanttyń ákesi, táýelsiz Qazaqstannyń jetekshi ekonomısteriniń biri, akademık Iаhııa Áýbákirov osy Shet aýdanyndaǵy Aqtóbe degen alaqandaı aýylda dúnıege kelgen.
Qazaq mýzyka óneriniń abyroıyn asqaqtatyp, onyń bekzat bolmysyn búkil álemge tanytqan Jánııa Áýbákirovany Shet aýdanynyń azamattary sán-saltanatpen qarsy alyp, erekshe syı-qurmet kórsetti. Týǵan jerge saparynyń alǵashqy qadamyn áıgili pıanıst ata-babasy máńgilik tynys tapqan mekenge baryp, olardyń rýhyna taǵzym etýden bastady. Odan keıin atasy jaz jaılaǵan «Áýbákir bulaǵy» degen jaılaýǵa at basyn tejep, tumsa tabıǵat aıasynda, aǵaıyn-týys pen aýyldastarynyń qurmetine bólendi. Tuma bulaqtan sý iship, aýyl aqsaqaldarynyń ata-babanyń ómirdastany, týǵan jer tarıhy jaıynda aıtqan áserli áńgimelerine qulaq saldy.
Shet aýdanynyń ortalyǵy Aqsý-Aıýly kentinde Jánııa Iаhııaqyzyn eńbektegen baladan eńkeıgen qarııaǵa deıin taǵatsyzdana kútip turǵan edi. Bulaı bolatyn da jóni bar. Qolǵa túse bermeıtin qonaq bul óńirge, ata-babasynyń mekenine bala kúninde bir kelgeni bolmasa, bylaıǵy kezde at izin salmaǵan eken. Kenttegi mádenıet úıinde ótken kezdesý barysynda aýdandyq máslıhattyń sheshimimen Jánııa Áýbákirovaǵa «Shet aýdanynyń qurmetti azamaty» ataǵy saltanatty túrde tabys etildi. Mundaı syı-qurmetke erekshe tánti bolǵan qazaqtyń talantty qyzy jerlesterine basyn ıip alǵys aıtty. Sahnanyń tórinde turǵan fortepıanoǵa baryp, óziniń rızashylyǵyn mýzyka tilimen tógildirte jetkizdi.
Kezdesý barysynda Jánııa Iаhııaqyzy jerlesteriniń suraqtaryna egjeı-tegjeıli jaýap berip, óziniń bolashaqqa degen josparlarymen bólisti. Kesh sońynda el aǵalarynyń biri, Shet aýdanynyń qadirmendi aqsaqaly Boranbaı Jumkın: «Jánııa Áýbákirova – bir atanyń, bolmasa bir aýdannyń ǵana qyzy emes, ol – barsha qazaqtyń alaqanǵa salǵan aıaýly qyzy» deı kelip, qushaǵy gúlge tolyp, jan saraıy yqylastyń nuryna shomǵan kesh ıesine aq batasyn berdi.
О́ner ıesiniń týǵan jerge táý etip kelgen saparyn onyń qurmetine jaıylǵan aq dastarqan túıindedi. Aq tilek aqtarylyp, ystyq yqylas nur bolyp quıylǵan keshte jerlesteri Jánııadaı qazaqtyń aıaýly qyzyna báıgeniń aldyn bermeı júrgen júırik at mingizdi. Bir sózben aıtqanda, eldiń atyn shyǵarǵan altyn qyzǵa degen aǵaıynnyń qurmeti eren boldy.
Kesh sońynda Jánııa Áýbákirova osy ıgi sharany uıymdastyrýǵa muryndyq bolǵan qadirmendi aqsaqal Boranbaı Jumkınge, osy óńirdiń týmasy, Májilis depýtaty Nurlan Dýlatbekovke, belgili qalamger Sáýlebek Jámkenovke, Shet aýdanynyń ákimi Marat Jandáýletovke, aýdandyq máslıhat depýtattaryna, Altybaı Ybyraev pen Qurmanǵazy Ámirov bastaǵan barsha jerlesterine júrekjardy alǵysyn jetkizdi. Álemniń áıdik sahnalarynda turyp syı-qurmet pen qoshemettiń jeti atasyn kórgen áıgili mýzykant munyń barlyǵynyń jerlesteri jaıǵan qushaq pen pák peıiliniń janynda túkke de turmaıtynyn tebirene aıtty.
Qaırat ÁBILDA,
«Egemen Qazaqstan»
Qaraǵandy oblysy,
Shet aýdany