Qalanyń ortalyq saıabaǵy tańerteńnen kún batqansha ersili-qarsyly adamnan arylmaıdy. Jaı basyp, demalyp júrgen adamdar qalanyń azan-qazan shýyna ábden qulaǵy jaýyr bolǵandyqtan ba, saıabaqtaǵy sán úshin qoıylǵan temir baǵannyń basyna qystyrylyp qalǵan qustyń daýysyn eshkim de eleń qylǵan joq. Tek qyzymen qydyryp júrgen Tatıana Vladımırovna ǵana temir baǵannyń tusynan bir-eki ret ótkende qustyń daýysy qınala shyǵyp jatqanyn baıqady.
Bıik baǵannyń ushar basyndaǵy qustyń bir qanaty salbyrap ketipti, basy kóriner-kórinbes. Onyń paıymdaýynsha, qus qarǵa sııaqty. Demek túımedaq gúlin beınelegen temir baǵannyń jan-jaqqa maıystyrylǵan butaqtarynyń ortasy shuńǵyl bolǵan, qus sonda túsip ketken bolýy tıis. Baǵan tym bıik, oǵan tek kran kerek. Keshke qaraı kimdi tapsyn, ertesine ol qalalyq turǵyn úı-kommýnaldyq sharýashylyǵyna habarlasyp, kórgen jaıtty aıtty, qusty qutqarmasa, kóp uzamaı ólip qalatynyn eskertti.
Habar jetisimen saıabaqqa «Adal-I» kásipornynda elektrmontajshy bolyp isteıtin Asqar Sársenov kelip, avtokrannyń kómegimen temir baǵannyń ushar basynda metaldan jasalǵan «túımedaq gúliniń» «tutqyny» bolyp otyrǵan ala qarǵany bosatyp aldy.
– Ala qarǵa bıylǵy balapan bolýy kerek. Ol baǵannyń basynda óte uzaq, keminde eki kún otyrǵan tárizdi. Typyrlaı-typyrlaı qaýyrsyndary synǵan, ózi ábden álsiregen, qanatyn qaǵýǵa da shamasy kelmedi. Jaqsylyqty qus ta biledi, ol bizden qashqan joq. Shúberekpen orap, Tatıana Vladımırovnaǵa tabys ettik, – deıdi Asqar.
Ala qarǵa ashtyq pen sýdan ábden qatalap qalǵan eken. Sol kúnderi Qostanaıda shilde de shilińgir minez tanytqan edi. Qazir ony óziniń basty qutqarýshysy Tatıana Vladımırovna úıinde ustap otyr. Aldyna qoıǵan tamaq pen sýdy irkilmeı iship-jeıdi, qalpyna kele bastaǵan. Ala qarǵanyń úıge de, meıirimge de boıy úırenip qaldy. Qustyń túsip qalǵan qaýyrsyny ornyna kelgen soń, ol bostandyqqa jiberiledi.
Názıra JÁRIMBET,
«Egemen Qazaqstan»
QOSTANAI