Prezıdent janyndaǵy Memlekettik basqarý akademııasyna magıstratýra men doktorantýranyń bilim berý baǵdarlamalary boıynsha oqýǵa túsýge nıetti úmitkerler sany jyl saıyn artyp otyr. Máselen, byltyr bir orynǵa ekeýden bolsa, bıyl úsh úmitkerden kelgen.
Al talap burynǵydaı óte joǵary, synaqtary salmaqty. Buǵan keshe úmitkerlermen suhbattasý nysanyndaǵy qabyldaý synaǵyn ótkizý barysynda da kýá boldyq. Suhbattasý túrindegi qabyldaý synaǵy sıfrly tehnologııalardy qoldana otyryp júrgizildi. Oǵan emtıhan komıssııasynyń múshesi retinde Aqparat jáne kommýnıkasııalar mınıstri Dáýren Abaev qatysty.
Akademııaǵa túsýge úmitkerlerden bıyl 400-ge jýyq ótinish qabyldanǵan eken. Al olarǵa bólingen grant sany magıstratýra úshin – 120, al doktorantýra úshin – 12. Irikteý kezeńinde úmitkerler úsh saty boıynsha synaqtan ótedi.
Búginde úmitkerlermen suhbattasý nysanyndaǵy qabyldaý synaǵy ótip jatyr. Bul rette aıryqsha atap óter jaıt, oqýǵa úmitkerlerdi irikteý úderisi retinde suhbattasý sıtýasııalyq tapsyrmalardy – keısterdi sheshýmen, sıfrly tehnologııalardy qoldana otyryp júrgizilýde. Al bul iske asyrylyp jatqan «Sıfrly Akademııa» jobasy sheńberinde qabyldaý emtıhandaryn ótkizýdiń Akademııada aprobasııadan ótken jańa formaty.
Baǵdarlamalar boıynsha emtıhan komıssııasynyń quramynda Parlament Senatynyń depýtaty, Prezıdent Ákimshiligi, Qaýipsizdik Keńesi, Premer-Mınıstr Keńsesi, «Nur Otan» HDP, ortalyq jáne jergilikti atqarýshy organdardyń ókilderi, Aqparat jáne kommýnıkasııalar mınıstri, kommersııalyq qurylymdar, ǵylymı-zertteý ınstıtýttar, Nazarbaev Ýnıversıteti, Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi, Akademııanyń sheteldik áriptes joǵary oqý orny – Sırakýz ýnıversıteti Maksvell mektebiniń (Nıý-Iork, AQSh) professory, sondaı-aq shet memleketterdiń elshileri men Akademııanyń professorlary bar.
Túsý synaqtarynyń nátıjesi boıynsha úmitkerlerge Akademııaǵa oqýǵa qabyldaý týraly habarlama jiberiletin bolady.
Dınara BITIK,
«Egemen Qazaqstan»