Mıanmanyń Nepıdo qalasynda voleıboldan erler arasyndaǵy Azııanyń klýbtyq chempıonaty aıaqtaldy. Osy jarysta baq synaǵan bıylǵy jylǵy Qazaqstan birinshiliginiń jeńimpazy – «Atyraý» kúmis medaldi ıelendi.
Aıtýly dodada sary qurlyqtyń eń úzdik 13 komandasy sheberlik baıqasty. «A» tobynda óner kórsetken «Atyraý» tusaýkeser kezdesýde Irannyń «Khatam Ardakan» klýbyna utylǵanymen, kelesi básekelerde Katar men Japonııanyń ókilderin jeńdi. Pleı-off saıystarynda Shrı-Lanka men Pákstan voleıbolshylarynan basym túsken jerlesterimiz fınalda qaıta Parsy eliniń órenderimen kezdesti. Bul joly da ırandyqtardyń mysy basym bolyp, olar bas júldeni oljalady. Úsh settik match 27:29, 23:25 jáne 22:25 esebimen aıaqtaldy. «Atyraý» kúmis medaldi ıelense, pákstandyqtar úshinshi satyǵa taban tiredi.
Mıanamada ótken jarysta «Atyraýdyń» sapynda Islam Jumabekov, Roman Handrolın, Narıman Súleımenov, Oleg Shevchenko, Alpamys Hılımov, Aıbat Netalın, Anton Pletnev, Damır Ákimov, Petr Chýrzın, Vasılıı Nosenko, Sergeı Kýznesov, Anton Kýznesov, Vıtalıı Vorıvodın jáne Maksım Mamedov syndy oıynshylar óner kórsetti.
Esterińizge sala keteıik, Azııanyń klýbtyq chempıonaty osymen 19 márte uıymdastyrylyp otyr. Bul básekelerde eń kóp oljaǵa kenelgen Irannyń voleıbolshylary. Parsy eliniń komandalary 13 ret jeńis tuǵyrynyń eń bıik satysyna kóterildi. Ońtústik Koreıanyń oǵylandary eki márte teńdessiz dep tanylsa, Qytaı, Qazaqstan, Katar jáne Taıpeıdiń voleıbolshylary bir-bir retten top jardy. Osy oraıda Irannyń «Taıkan» klýby jeti ret jeńimpaz atanǵanyn da aıta ketýge tıispiz.
Qazaqstannyń ókilderi Azııanyń klýbtyq chempıonatynda jeti ret jeńis tuǵyryna kóterildi. 2002 jáne 2004 jyldary «Atyraý» qola medaldi qorjynǵa salsa, 2005 jyly Almatynyń «Rahaty» bas júldeni oljalady. 2006 jyly «Rahat» kúmispen kúptelse, 2008 jáne 2011 jyly «Almaty» klýby dál sol mejeden kórindi. Mine, endi arada jeti jyl ótkennen keıin qazaqstandyqtar qaıta júldegerler qatarynan kórindi. Bul joly «Atyraý» ekinshi oryndy enshilep, óz jankúıerlerin qýantty.
Sońǵy eki Azııanyń klýbtyq chempıonaty Irannan kelgen «Sarmaıe Benk» komandasynyń jeńisimen aıaqtaldy. 2016 jyly Mıanmada ótken jarystyq aqtyq synynda olar Katardyń «Ál-Arabıin» utsa, 2017 jyly Japonııanyń «Toıoda Goseıinen» aılasyn asyrdy. Ǵalym SÚLEIMEN,
«Egemen Qazaqstan»