30 tamyzda Elordada «Aq ordaly Astana» halyqaralyq poezııa keshi ótedi, dep habarlady MSM baspasóz qyzmeti.
Astananyń 20 jyldyǵyna oraı uıymdastyrylǵan is-sharaǵa elimizdegi jáne sheteldik tanymal aqyndar qatysady. Atap aıtqanda shyǵarmashylyq keshke fınlıandııalyq aqyn, esseshi, slavıan, orys ádebıetiniń aýdarmashysy Iýkka Mallınen, aqyn, jetpis kitaptyń avtory, Shanhaı ýnıversıtetiniń professory Oýıang Iý, Fransýz jazýshysy, pýblısıst jáne aýdarmashy, prozashy Terrı Marınıak, aqyn, baspager, sýretshi Malgojata Mahlevskaıa, aqyn, baspager Gagık Davtıan, aqyn Lıýbov Krasavına, aqyn, prozashy, synshy, «Lıteratýrnyı gazety» atty gazettiń bas redaktory Maksım Zamshev, aqyn Sergeı Mnasakanıan, aqyn, aýdarmashy Mıhaıl Sınelnıkov qatysady.
«Mádenıet jáne sport mınıstrliginiń uıymdastyrýymen ótkeli otyrǵan «Aq ordaly Astana» halyqaralyq poezııa keshiniń bereri mol erekshe is-shara bolǵaly tur. Osy kúnge deıin bizdiń qalamgerler shet elderge baryp olardyń astanalaryn jyrǵa qossa, endi mine, táýelsizdiktiń arqasynda bizdiń astanaǵa shet el aqyndary jyr arnamaq. Bul qazaq eliniń jetken jetistigi, mártebesiniń óskeni. Árıne, mundaı basqosý biz úshin óte qajet. Aqyn-jazýshylar da erkin tájirıbe almasyp, shet el aqyn jazýshylarymen teń turyp sóılep, keń turyp kósilip jumys isteıtindeı dárejege jetkizetin osy bir Halyqaralyq poezııa keshin erekshe kútip júrgen jaıymyz bar. Shet elge bererimiz de, shet elden alarymyz da kóp», deıdi belgili aqyn Baýyrjan Qaraǵyzuly
Erlan Júnis, aqyn, QJO Almaty oblystyq fılıalynyń dırektory:
«Qazaq dalasy qaı ǵasyrda da álem tarıhshylary, mádenıettanýshylar, aqyndar men ǵalymdar úshin tańǵajaıyp keńistik – altyn sandyq ispetti bolǵan. Kóne qalalarymyz – Taraz ben Súıab, Farab pen Iаsy jóninde qalam tartpaǵan, jyryna ózek, jazbasyna arqaý qylmaǵan shaıyrlar men hakimder neken-saıaq. Táýelsizdik alǵannan keıingi jyldary jańa Qazaqstan álem ǵalymdarynyń, din basylarynyń, saıasattanýshylardyń pikirlesý alańyna aınaldy. QR Mádenıet jáne sport mınıstrliginiń «Astana – Álem aqyndary kózimen» atty aýqymdy is-sharasy álem qalamgerleri men el qalamgerleri arasynda altyn kópir bolatyndyǵymen qýantady. Astanany jyrlaý – Qazaq eliniń ótkeni men búginin, jarqyn keleshegin, onyń asqaq armandary men asyl murattaryn jyrlaý. Osy turǵydan kelgende bul is-shara mádenı oqıǵa bolǵaly tur dep sanaımyn».