Redaksııamyzǵa Almaty oblysy Jambyl aýdanyndaǵy Myńbaev aýylynyń turǵyny Qanaıat Ábdibekuly esimdi azamat habarlasqan bolatyn. Biz baýyr eti balasy úshin janushyrǵan ata-ananyń sózine qulaq túrip, máseleniń mán-jaıyna úńildik. 3 jasar qyzynyń aýyr halde ekenin aıtty.
Qanaıattyń aıtýynsha, maýsym aıynda tumaý tıip aýyrǵan balasyn Uzynaǵashtaǵy aýrýhanaǵa aparyp, ókpesin rentgenge túsirgen. Rentgen nátıjesi boıynsha Myńbaev aýyly aýrýhanasyndaǵy dárigerler júregin ÝDZ-ǵa túsirýge Perınatologııa jáne balalar kardıohırýrgııa ortalyǵyna jiberedi. Al ondaǵy dárigerler balanyń júreginde tesik bar ekenin aıtyp, jedel operasııaǵa daıyndaıdy. Sóıtip 11 shilde aýrýhanaǵa jatqyzylǵan balaǵa 17 shildede Perınatologııa jáne balalar kardıohırýrgııa ortalyǵynda operasııa jasalady.
«Dáriger operasııanyń sátti ótkenin aıtyp, balany bir aptaǵa deıin uıqy dári berip oıatpaý kerek ekenin jetkizdi. Balam 10 kún jansaqtaý bóliminde es-tússiz jatty. Dárini toqtatqan soń da 3-4 kúnge deıin esin jımady. Balam kózin ashqanda eki kózi de kórmeıtin, qol-aıaǵy jansyz, denesine jaralar shyqqan bolyp shyqty. Nevropatolog dáriger mı qantamyryna qan jetispeıdi degen dıagnoz qoıdy. 25 tamyzda Almaty oblystyq balalar klınıkalyq aýrýhanasyna aýystyrdy. Biraq balada oń ózgeris joq», deıdi Qanaıat Ábdibekuly.
Biz bul másele boıynsha Perınatologııa jáne balalar kardıohırýrgııa ortalyǵynda Nuraıym Qanaıatqa jaýapty bolǵan dáriger, balalar kardıohırýrgy Qaırat Qýatbekovke habarlastyq. Dáriger operasııaǵa kirip bara jatqanyn aıtyp, telefon arqyly jaýap bermeıtinin jetkizdi. «Operasııaǵa kirgeli turmyn... Ol bala qazir bizdiń aýrýhanada jatqan joq. Sondyqtan da aıta almaımyn. Tek týa bitti júrek aqaýy, júrek ishindegi qarynsha aralyq perde aqaýy, ókpe tamyrynyń gıpertenzııasy bar ekenin ǵana bilemin. Naqtysyn aıtý úshin aýrý tarıhyna qaraý kerek», dedi Q.Qýatbekov.
Ile-shala Almaty oblystyq balalar klınıkalyq aýrýhanasyna habarlasyp, Nuraıymnyń qazirgi dárigeri Ǵazıza Bısalıevadan naýqastyń qazirgi hal-jaǵdaıyn suradyq. «Aýrýhananyń ákimshiliginen ruqsat alǵan soń ǵana jaýap beremin. Ruqsat bolmasa eshqandaı aqparat bermeımiz. Ondaı aqparatty tek qana ata-anasyna beremiz», dedi ol.
Balanyń dıagnozdary jazylǵan anyqtamany Astanadaǵy kardıolog mamanǵa oqytqanymyzda «Balada júrektiń qarynshaaralyq qalqanynyń kemshiligi bar degen dıagnoz qoıylǵan. Sol kemshilikti tigý úshin operasııa jasalǵan. Otadan keıin sińir tartý epızody bolǵan. Bólim meńgerýshisimen birge qaraý júrgizgende balanyń mı qan aınalymy buzylǵan dep dıagnoz qoıylypty. Okýlıst kóz tamyrlarynyń zaqymdalýy otteginiń jetispeýshiliginen ekenin aıtqan. Bul anyqtama boıynsha barlyq másele mıdyń qan aınalymynyń buzylýynan bolyp tur. Konsılıým jınap, bir sheshimge kelý kerek», dedi.
Redaksııa bul máseleni egjeı-tegjeıli anyqtaý úshin aldaǵy ýaqytta barlyq jaǵdaıdy nazarda ustaıdy.
Maıgúl SULTAN,
«Egemen Qazaqstan»