1-5 qyrkúıek aralyǵynda Reseıdiń Elısta qalasynda bokstan stýdentter arasyndaǵy álem chempıonatynyń jalaýy jelbireıdi. Osymen jetinshi márte uıymdastyrylǵaly otyrǵan aıtýly jarysta elimizge eńbek sińirgen jattyqtyrýshy Dastan Sádýaqasov jetekshilik etetin Qazaqstan quramasy da óner kórsetedi.
Elıstadaǵy dodada Qazaqstannyń alty stýdenti baq synaıdy. Solardyń arasynan Dastan Sádaýqasovtyń tól shákirti Bekbolat Quramysovty bóle-jara ataýǵa bolady. 69 kılo salmaq dárejesinde kúsh synasyp júrgen Atyraý oblysynyń túlegi osydan eki jyl buryn stýdentter arasynda Taılandta ótken álem chempıonatynda kúmis medaldi ıelenip, Tájikstandaǵy Azııa birinshiliginde qolaǵa qol sozdy. Shymkenttegi el chempıonatynda ol úshinshi orynǵa taban tirep, Dúnıejúzilik boks serııasy dodasynda «Astana arlandary» sapynda úlken tájirıbe mektebinen ótti.
Bekbolattan bólek, 60 kılo salmaqtaǵy Erjan Ordabaevtyń da áleýeti joǵary baǵalanýda. Tanymal bapker Sársenbaı Torǵaevtyń qol astynda jattyǵatyn bul bylǵary qolǵap sheberi osydan birer jyl buryn Qazaqstan chempıony atanyp, Munaıly elder arasynda dástúrli túrde ótip turatyn álem kýbogy jolyndaǵy jarystyń jeńimpazy atandy. Sondaı-aq, aıtýly dodada Abylaı Qýandyqov (52 kılo), Erasyl Shoqanov (56 kılo), Amandyq Manashıev (75 kılo) jáne Aıat Marjyqbaev (81 kılo) syndy boksshylar sharshy alańǵa shyǵady.
2016 jyly Taılandtyń Chıang-Maı qalasynda ótken álem chempıonatyna el quramasyn ózim bastap aparǵan edim. Sol kezde óte jaqsy óner kórsetip, alty órenimiz jeńis tuǵyryna kóterildi. Atap aıtsaq, Dıdar О́telbaev, Álı Ahmedov jáne Nursultan Amanjolov altyn alsa, Bekbolat Quramysov kúmispen kúpteldi. Al Ertýǵan Zeınýlınov pen Rahat Marjyqbaev qolaǵa qol jetkizdi. Bıyl ol nátıjeni qaıtalaý qıyn bolady. Sebebi, komanda qaıta jasaqtaldy. Burynǵy myqtylardyń ornyn daryndy jastar basty. Olardyń deni áli de osyndaı iri dúrmekterde jeńistiń dámin tatyp kórmegen. Desek te Elıstada keminde bir altynǵa qol jetkizip, birneshe júlde alý úshin janymyzdy salyp aıqasamyz, – deıdi Qazaqstannyń stýdentter quramasynyń aǵa jattyqtyrýshysy Dastan Sádýaqasov.
Esterińizge sala keteıik, stýdentter arasyndaǵy álem chempıonaty 2004 jyldan beri úzdiksiz uıymdastyrylyp keledi. Antalııada ótken alǵashqy jarystan jerlesterimiz qur alaqan oralǵan. Esesine 2016 jyly Almatyda jalaýy jelbiregen dodada 6 altyn, 2 kúmis jáne 3 qolany qorjynǵa saldyq. Sol kezdegi komandalyq bas júlde bizge buıyrdy. 2008 jyly Qazanda 1 altyn, 5 kúmis jáne 2 qolany ıelendik. 2010 jyly Ulan Batyrda 1 altyn, 4 kúmis jáne 4 qolany enshiledik. 2012 jyly Bakýde 4 qola medaldi qanaǵat tuttyq. 2014 jyly Iаkýtskide 2 altyn, 3 kúmis jáne 2 qola júldeni oljaladyq.
Osyndan eki jyl buryn Taı elinde jalaýy jelbirgen dúnıejúzilik dodada 3 altyn, 1 kúmis jáne 2 qolany qanjyǵasyna baılaǵan Qazaq eliniń stýdentteri komandalyq esepte ekinshi orynǵa jaıǵasqan edi. Sol jarysta jerlesterimz tek Reseıden ǵana qalyp qoıdy.
Ǵalym SÚLEIMEN,
«Egemen Qazaqstan»
ALMATY