Nıý-Iorkte ótip jatqan AQSh-tyń ashyq birinshiliginiń áıelder saıysynda bas júlde úshin talasý quqyǵyna ıe bolǵan qos tennısshi anyqtaldy. Olar – amerıkalyq Serena Ýılıams pen japonııalyq Naomı Osaka.
Bul kúnderi WTA tiziminde 26 orynda turǵan ataǵy alysqa jaıylǵan Serena Ýılıams álemniń 18 raketkasy latvııalyq Anastasııa Sevastovany esh qınalmaı-aq utty. Birinshi set 6:3 esebimen AQSh oıynshysynyń paıdasyna sheshilse, ekinshi sette qarsylasy bas kóterýge de jaramady – 6:0. Ekinshi jartylaı fınalda Naomı Osaka (№19) amerıkalyq Medıson Kızdi (№14) qapy qaldyrdy – 6:2, 6:4. Osy týrnırdiń eń úzdik qos tennısshisi arasyndaǵy aqtyq aıqas 8 qyrkúıekte ótedi.
Búgin erler arasyndaǵy jartylaı fınaldyq saıystardy tamashalaımyz. Bul básekeler ıspanııalyq Rafael Nadal men argentınalyq Hýan Martın del Potro jáne serbııalyq Novak Djokovıch pen japonııalyq Keı Nıshıkorı arasynda ótedi. Alǵashqy úsheýi buǵan deıin de AQSh-tyń ashyq birinshiliginde jeńimpaz atanǵan bolatyn. Atap aıtsaq, Nadal (2010, 2013, 2017) bul ataqqa úsh ret qol jetkizse, Djokovıch (2011, 2015) eki márte top jardy. Del Potro (2009) bir ret dara shyqty. Al Nıshıkorıge bas júlde áli buıyrǵan joq. Ol 2009 jyly aıtýly týrnırdiń aqtyq synynda óner kórsetti. Dál sol jarystyń sheshýshi básekesinde Japonııanyń juldyzy Novak Djokovıchke ese jibergen edi. Mine, endi sol qos sańlaqtyń joly jartylaı fınaldy qıysqaly otyr.
Ǵalym SÚLEIMEN,
«Egemen Qazaqstan»