Jańa Konstıtýsııanyń normalary óndiris oryndaryndaǵy adamdar úshin naqty, ómirlik mánge ıe. Bul týraly Konstıtýsııalyq reforma jónindegi komıssııanyń toǵyzynshy otyrysynda Májilis depýtaty Maksım Rojın málimdedi, dep habarlaıdy Egemen.kz.
«Eńbek adamy – ekonomıkanyń quraly emes, memlekettiń basty qundylyǵy. Jańa Konstıtýsııa jobasynyń negizgi ıdeıasy – memleket úshin eń qymbat nárse óndiris kólemi nemese paıda emes, adamnyń ózi. Jobada árkimniń: eńbek etýge, qaýipsiz jaǵdaıda jumys isteýge, eńbegi úshin kemsitýsiz ádil aqy alýǵa quqyǵy konstıtýsııalyq deńgeıde bekitiledi», dedi ol óz sózinde.
Maksım Rojınnyń aıtýynsha, jańa Ata Zańnyń jobasynda eńbek salasyna tikeleı qatysty birqatar mańyzdy jańashyldyqtar qarastyrylǵan. Sonyń ishinde memlekettiń eńbekke quqyqty Konstıtýsııalyq deńgeıde bekitýi erekshe mańyzǵa ıe. Sondaı-aq qaýipsizdik pen gıgıena talaptaryna saı eńbek jaǵdaılaryna quqyqty zań júzinde aıqyndaý kózdelgen. Bul normalar jumys barysynda týyndaýy múmkin kásibı aýrýlardyń aldyn alýǵa, óndiristik jaraqattanýdy azaıtýǵa, sondaı-aq azamattardyń eńbekke qabilettiligi men ómir sapasyn saqtaýǵa baǵyttalǵan.
«Mundaı normalar eńbek qaýipsizdigine qatysty jaýapkershilik mindetin – memleket pen jumys berýshiniń konstıtýsııalyq mindeti deńgeıine kóteredi. Ásirese negizinen jaldamaly jumyskerlerden turatyn álsiz salalardy retteýdiń naqty tetigin qalyptastyrady», dep atap ótti májilis depýtaty.
Adal eńbek úshin ádil syıaqy alý quqyǵynyń áleýmettik mańyzy zor. Bul norma azamattardyń eńbegi kásibı ólshemderge saı ádil baǵalanatynyna kepildik beredi. Rojınnyń aıtýynsha, qarapaıym azamattar úshin bul turaqty jumyspen qamtylý, qaýipsiz eńbek jaǵdaılary jáne eńbegi úshin ádil aqy alýǵa degen senimniń nyǵaıýyn bildiredi.
Aıta keteıik, búgin, 7 aqpanda Qazaqstanda Konstıtýsııalyq reforma jónindegi komıssııanyń kezekti otyrysy ótip jatyr. Otyrys barysynda Jańa Konstıtýsııanyń jobasyna teńgeni ulttyq valıýta retinde bekitetin norma engizilgeni aıtyldy.
«Volonterlik» uǵymyn Konstıtýsııada bekitý usynyldy