Shymkent qalasynda ornalasqan Halyqaralyq shtab birneshe eldiń quqyq qorǵaý organdarynyń ózara birlesken áreketterin úılestirý arqyly aýqymdy operasııany júzege asyrdy. Atap aıtsaq, Ujymdyq qaýipsizdik týraly shart uıymy (UQShU) múshe memleketteriniń esirtkige qarsy kúres bólimsheleri, sonymen qatar Iran Islam Respýblıkasy men Qytaı Halyq Respýblıkasynyń qatysýymen halyqaralyq «Kanal – Krasnyı barhan» esirtkige qarsy operasııa óz máresine jetti.
Eýropalyq odaq, Eýropadaǵy qaýipsizdik jáne yntymaqtastyq uıymy, Qylmystyq kiristerdi jáne terrorızmdi qarjylandyrýdy zańdastyrýǵa qarsy is-qımyl jónindegi Eýrazııalyq top, BUU-nyń Esirtki jáne qylmys jónindegi О́ńirlik basqarmasy, Ortalyq Azııa óńirlik aqparattyq úılestirý ortalyǵy syndy (OAО́AÚO) halyqaralyq uıymdardyń qyzmetkerleri baqylaýshy mindetin atqarǵan operasııaǵa 22 myńnan astam quqyq qorǵaý organdarynyń qyzmetkerleri qatysqan.
Apıyn kontrabandasy arnalarynyń jolyn kesý, transulttyq esirtki toptarynyń qyzmetine, esirtki kiristerin zańdastyrýǵa tosqaýyl qoıý, zańsyz aınalymdaǵy qarý-jaraqtar, oq-dáriler men jarylǵysh zattardy tárkileý negizgi mindetteri bolyp tabylatyn «Kanal – Krasnyı barhan» operasııasy barysynda Qyzylorda jáne Jambyl oblystarynda qarasorany zańsyz ósirý men daıyndaýǵa qarsy kúres sharalary qatar júrgizildi. Ishki ister mınıstrliginiń málimeti boıynsha, operasııa barysynda brondalǵan 4 «Tıgr» avtokóligi, «Baggı» synybyna jatatyn 6 birlik, júrip ótý múmkindigi joǵary 15-ten astam avtokólik, MI-171E tikushaǵy qoldanylǵan.
Aýqymdy is-sharalar nátıjesinde qatysýshy memleketter aýmaǵynda zańsyz aınalymnan 9 tonna esirtki, onyń ishinde 5 tonna apıyn, 38 kg geroın, 2 tonna sıntetıkalyq esirtkiler, 800 kg gashısh jáne 830 kg marıhýana, sonymen qatar 115 birlik qarý-jaraq, 2,5 myńǵa taıaý oq-dáriler, 127 myń AQSh dollary kóleminde baǵaly materıaldyq jáne basqa da zattar tárkilengen. Budan bólek 719 esirtki qylmysy ashylyp, 7 myńǵa taıaý qylmystyq is qozǵaldy. Zańsyz áreketteri úshin 500 adam ákimshilik jaýapkershilikke tartylǵan.
Sondaı-aq mınıstrliktiń habarlaýynsha, arnaıy operasııa sheńberinde IIM «Delta-Dolına» bólimshesiniń aýmaǵynda Qazaqstan jáne Qyrǵyzstan IIM kınologııalyq qyzmetteriniń birlesken jattyǵýlary, qyzmettik-izdestirý ıtteriniń kórneki óner kórsetýleri ótkizilgen.
Ǵalymjan ELShIBAI,
«Egemen Qazaqstan»
Shymkent