QR Ulttyq banki «Astana bankin» banktik jáne ózge de operasııalardy júrgizý lısenzııasynan aıyrdy, dep habarlaıdy Ulttyq bank baspasóz qyzmeti.
«QR Ulttyq Banki basqarmasynyń 2018 jylǵy 18 qyrkúıektegi № 214 qaýlysyna sáıkes «Astana Banki» AQ-ty «Qazaqstan Respýblıkasyndaǵy bankter jáne bank qyzmeti týraly» Zańnyń 48-baby 1-tarmaǵynyń v), g) jáne m-1) tarmaqshalarynda kózdelgen negizder boıynsha tólem jáne aýdarý operasııalary boıynsha sharttyq mindettemelerin júıeli túrde, prýdensııalyq normatıvterdi jáne oryndalýy mindetti basqa da normalar men lımıtterdi júıeli túrde buzǵany, sondaı-aq banktiń iri qatysýshysynyń ýákiletti organnyń ústeme kapıtaldandyrý jónindegi talaptaryn oryndamaǵany úshin banktik jáne ózge de operasııalardy júrgizýge Qazaqstan Respýblıkasynyń Ulttyq Banki Bankke 2015 jylǵy 20 sáýirde bergen № 1.1.32 lısenzııasynan 2018 jylǵy 19 qyrkúıekten bastap aıyrý týraly sheshim qabyldandy», delingen habarlamada.
Banktiń aktıvteri men mindettemeleriniń bank sektorynyń aktıvteri men mindettemelerindegi úlesiniń tómen bolýyna baılanysty (1%) Bankti lısenzııadan aıyrýdyń basqa qarjy uıymdar úshin táýekelderi bolmaıdy. Qazaqstan Respýblıkasynyń Ulttyq Banki Tóraǵasynyń 2018 jylǵy 18 qyrkúıektegi № 352 buıryǵymen ýaqytsha ákimshilik taǵaıyndaldy, oǵan Banktiń barlyq basqarý organynyń ókilettikteri ótti. Banktiń ýaqytsha ákimshiligi óz qyzmetin Banktiń taratý komıssııasy taǵaıyndalǵanǵa deıingi kezeńde júzege asyrady. Ýákiletti organnyń normatıvtik quqyqtyq aktilerinde kózdelgen shyǵystarǵa, Bankke túsken aqshany esepke alýǵa baılanysty jaǵdaılardy qospaǵanda, klıentterdiń jáne Banktiń óziniń banktik shottary boıynsha barlyq operasııa 2018 jylǵy 19 qyrkúıekten bastap toqtatyldy.
Qazaqstan Respýblıkasynyń Ulttyq Banki zańnamada belgilengen tártippen sotqa Banktiń qyzmetin májbúrlep toqtatý (taratý) týraly ótinishpen júginedi. Sot Bankti májbúrlep taratý týraly is qozǵaǵan kúnnen bastap Bankti ustaýǵa jumsalǵan aǵymdaǵy shyǵystarǵa baılanysty talaptardy qospaǵanda, kredıtorlardyń Bankke talaptary taratý isinde ǵana usynylady. Bank jeke tulǵalardyń depozıtterine mindetti kepildik berý júıesiniń qatysýshysy bolyp tabylady, soǵan baılanysty depozıtorlarǵa belgilengen tártippen kepildik ótemaqysy tólenetin bolady.