29-30 qyrkúıek aralyǵynda veloshabandozdar arasynda ótetin dástúrli «Almaty týry-2018» jarysynyń birinshi kezeńi tanymal sportshy, kóptegen respýblıkalyq jáne halyqaralyq jarystardyń jeńimpazy Andreı Kıvılevtiń qurmetine arnalady.
Sporttyq jolyn óziniń týǵan jeri – Taldyqorǵan qalasynda bastaǵan Andreı Kıvılev jastaıynan jasyndaı jarqyryp, elimizdiń mańdaıaldy veloshabandozdarynyń birine aınalady. 1994 jyly Hırosımada alaýy tutanǵan Azııa oıyndarynyń toptyq saıysynda jeńimpaz atandy. Odan keıin de talaı baıraqty básekede Qazaqstannyń namysyn abyroıly qorǵady. 1997 jyldan beri jerlesimiz kásipqoılar arasynda baq synaý qurmetine bólenip, qart qurlyqqa tanymal «Festına», «Ag2r Prévoyance» jáne «Cofidis» klýbtary sapynda tabysty óner kórsetti. 2001 jyly Kıvılev óziniń sporttyq mansabyndaǵy iri jeńisterge qol jetkizedi. Sol maýsymda birqatar jaýapty jarystarda jeńis tuǵyryna kóterilgen ol velosport áleminiń eń beldi dodasy – «Týr de Frans» kópkúndiginde tórtinshi orynǵa taban tirep, tórtkúl dúnıe jurtshylyǵy nazaryn ózine aýdardy.
2003 jyldyń kókteminde Andreı Kıvılev Fransııada dástúrli túrde ótip turatyn «Parıj–Nıssa» dodasyna qatysady. Máre syzyǵyna 40 shaqyrymdaı qalǵanda ol polshalyq Mareko Rýtkevıch jáne germanııalyq Folker Ordovskımen qaqtyǵysady. Jarys jolyna dýlyǵa kımeı shyqqan jerlesimiz basymen jerge ońbaı qulaıdy. Asa aýyr hálde jatqan qazaqstandyq sportshy áýelde jaqyn mańda ornalasqan aýrýhanaǵa jetkiziledi. Kóp keshikpeı ony tikushaqpen Sent-Eten qalasyndaǵy zertteý ortalyǵyna aparady. Dárigerler qansha jantalasqanymen, Andreıdi ajal tyrnaǵynan aman alyp qalý múmkin bolmady. 12 naýryzda 29 jastaǵy órenimiz kóz jumdy.
Al «Almaty týryna» keler bolsaq, bul básekede 2013 jyldan beri úzdiksiz uıymdastyrylyp keledi. Tusaýkeser dodada Maksım Iglınskıı top jarsa, odan keıin qatarynan tórt ret Alekseı Lýsenko jeńimpaz atandy. Bıylǵy jarys ta ádettegideı eki kezeńnen turady. Ol «Astana» alańynan bastaý alyp, «Medeýde» óz máresine jetedi.
Ǵalym SÚLEIMEN
«Egemen Qazaqstan»
ALMATY