Parlament Senaty Halyqaralyq qatynastar, qorǵanys jáne qaýipsizdik komıtetiniń depýtattary Qorǵanys jáne aeroǵarysh ónerkásibi mınıstrliginiń basshylyǵymen kezdesip, elimizdiń áskerı ónerkásip kesheni men aeroǵarysh salasyn damytý máselelerin talqylady, dep habarlaıdy Parlament Senatynyń Baspasóz qyzmeti.
Qorǵanys jáne aeroǵarysh ónerkásibi mınıstri Beıbit Atamqulov depýtattarǵa búgingi kúnge deıin atqarylǵan jumystar týraly baıandama jasady. Ol sondaı-aq senatorlarǵa «Qorǵanys ónerkásibi jáne memlekettik qorǵanys tapsyrysy týraly» zań jobasyn tanystyryp, qorǵanys jáne aeroǵarysh qyzmeti máseleleri jónindegi qoldanystaǵy zańnamaǵa usynylyp otyrǵan ózgerister men tolyqtyrýlar týraly aıtyp berdi.
Senatorlar jyl boıy osy salany egjeı-tegjeıli zerdeledi. Olar «Qazaqstan Ǵarysh sapary» ulttyq kompanııasynyń, Aqkól qalasyndaǵy ǵarysh kemeleri men baılanys monıtorıngi júıesin basqarýdyń jer ústi kesheniniń qyzmetimen tanysty, «Eurocopter» tikushaq qurastyrý zaýyty men Soltústik Qazaqstan jáne Shyǵys Qazaqstan oblystaryndaǵy qorǵanys ónerkásibi keshenine qarasty birqatar kásiporyndarda boldy. Sharalar qorytyndysy boıynsha tıisti usynystar ázirlenip, úkimetke jiberildi.
Senatorlar Serik Jaqsybekov pen Talǵat Musabaev qorǵanys ónerkásibi kesheni kásiporyndarynyń óndiris qýatyna saı tolyq kólemde jumys berilmeı otyrǵanyna, damýdyń strategııalyq josparynyń joqtyǵyna, bilikti mamandar saıasatyna qatysty birqatar syn eskertpelerin aıtty.
Jan-jaqty pikirsaıystan keıin Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva talqylanǵan máseleler Qarýly kúshterdi qaıta jabdyqtaý tujyrymdamasyn iske asyrýda mańyzdy ról atqaratynyn atap ótti.
Memleket basshysynyń tapsyrmasyna oraı Qazaqstanda taıaý jyldarda qorǵanys ónerkásibiniń 9 kásipornynda tehnologııalyq jańǵyrtý júzege asady jáne keleshegi zor ónimder óndirýge baǵdarlanǵan, eksportqa shyǵarýǵa múmkindigi bar árbir kásiporyndy jańǵyrtý jónindegi jol kartasy ázirlendi.