Sondaı Túıisý núktesiniń biri Qazaqstan, О́zbekstan jáne Túrikmenstan Respýblıkalary shekaralary bastalatyn Mańǵystaý oblysyndaǵy Ústirt qyratynda belgilengen. Ústirt ejelden saıahatshylar men geograftardyń, ken barlaýshylardyń nazaryn aýdaryp kele jatqan meken. Mine, osy qyratta atalǵan úsh memleket shekaralarynyń Túıisý núktesi belgilenetindigi týraly shartqa úsh eldiń Memleket basshylarynyń qoldaýymen Syrtqy ister mınıstrleri О́zbekstannyń Samarqand qalasynda 2017 jylǵy 10 qarashada qol qoıǵan. Bul týraly Májilistiń jalpy otyrysyna shyǵarylǵan kelisimdi ratıfıkasııalaý týraly zań jobasyn talqylaý barysynda Syrtqy ister mınıstriniń birinshi orynbasary Muhtar Tileýberdi baıandap berdi. Bul shart merzimsiz jáne denonsasııalaýǵa jatpaıdy. Demek odan eshqashan bas tartýǵa bolmaıdy degen sóz. M.Tileýberdi óziniń sózinde «shartty ratıfıkasııalaý – Qazaqstan, Túrikmenstan jáne О́zbekstan memlekettik shekaralaryn delımıtasııalaý prosesin aıaqtaýǵa, aýmaqtyq daýlar týyndaýynyń aldyn alyp, joıýǵa, elimizdiń ulttyq qaýipsizdigin nyǵaıtýǵa yqpal etedi» dedi.
Zań jobasyn talqylaýǵa qatysqan depýtat Jeksenbaı Dúısebaev Túıisý núktesiniń geografııalyq orny burynǵy keńestik koordınatalar júıesimen geodezııalyq jáne topografııalyq karta boıynsha aıqyndalǵanyn aıta kelip, Baltyq teńizi bıiktikter júıesi boıynsha anyqtalatyn, 1942 jyldan beri qoldanylyp kelgen koordınatalar eskirgendikten ulttyq koordınatalar júıesi qashan jasalady degen suraq qoıdy. Oǵan osy talqylaýǵa qatysqan Aýyl sharýashylyǵy mınıstriniń birinshi orynbasary Arman Evnıev jaýap berip, bul isti jasaý úshin qazir birneshe vedomstvo birlesip, jumys tobyn quryp qolǵa alǵanyn, Ulttyq koordınatalar júıesi aldymyzdaǵy 5-6 jylda daıyn bolatynyn aıtty.
Depýtat Quralaı Qareken Túıisý núktesi ornalasqan jer ózbekshe «Shor qazaqly» dep atalatynyn, al muny túrikmender «Qazaqly sor» dep ataıtynyn, al qazaqsha ataýy múlde joq ekenine nazar aýdaryp, osynyń ózi keıin talas týdyrmaı ma dep surady. Jaýapta bul máseleniń óte ózekti bolyp, qujatty ázirleý barysynda da nazar aýdarylǵandyǵy aıtyldy. «Biz Qazaqstannyń geografııalyq ataýlarynyń memlekettik katalogyna da júgindik, biraq naqty qazaqsha ataý tappaǵan soń, osy eki ataýdy moıyndaýǵa kelistik», dedi vıse-mınıstr.
Mine, osyndaı qyzǵylyqty suraqtarmen, oryndy talqylaýlarmen zań jobasy maquldanyp, Senattyń qaraýyna jiberildi. Bul zań jobasy elimizdiń shekarasyn shegendeı túsýdegi taǵy bir naqty qadam bolǵany haq.
Jaqsybaı SAMRAT,
«Egemen Qazaqstan»