Búgin «Jas Otan» Jastar qanatynyń belsendileri Halyqaralyq qarttar kúnine oraı «Ardagerlerdi ardaqtaıyq» partııalyq jobasynyń aıasynda «Qarttarym – asyl qazynam» atty aksııasyn ótkizdi.
Elimizdiń ár óńirinde Uly Otan soǵysy jáne tyl ardagerleriniń shańyraǵynda, qarttar úılerinde bolyp, ataýly kómekter, merekelik keshter men syılyqtar tabystady. Aksııa aıasynda Jas Otandyqtar elimizdiń barlyq aımaqtarynda 700-ge jýyq kómekke muqtaj qarııaǵa qolǵabys kórsetip, merekelik kóńil-kúı syılady.
Belsendi jastar «Ardagerlerdi ardaqtaıyq» partııalyq jobasy boıynsha 700-den astam UOS jáne tyl ardagerlerine birneshe jyl qatarynan júıeli túrde kómek kórsetip keledi. Belsendiler óz oblysynda nemese aýylynda turatyn kómekke muqtaj qarııalardyń úıine baryp, kúndelikti sharýalaryna jıi járdem beredi. Kúz aılarynda qysqa daıyndyqqa kómektesse, qysta aýlalaryn qardan tazartyp, úıin jınastyryp, sharýashylyǵyna qolǵabys bolady. Ásirese eriktiler kóktemde sý tasqyny men basqa da aýa raıynyń qolaısyzdyǵynan qıyndyq kóretin aýyldy aımaqta jalǵyz turatyn qarııalarǵa kómek kórsetedi.
«Jas Otan» Jastar qanatynyń atqarýshy hatshysy Dáýlet Káribek qarııalar men jastar arasynda tyǵyz qarym-qatynastyń mańyzdylyǵyna toqtaldy.
«Elimizdiń barlyq aımaqtarynda Jas Otandyqtar qarttar úılerine baryp, merekelik is-sharalar uıymdastyryp, olardy demalys kúnderi teatr, konserttik is-sharalarǵa aparady. Jastardyń úlkenderden úıreneri kóp, sol sebepti de bul sharalar turaqty túrde uıymdastyrylyp turady».
Basty maqsat az qamtamasyz etilgen qart adamdarǵa, jalǵyzbasty qart zeınetkerler men qart múgedekterge kóńil bólý, olarǵa materıaldyq, áleýmettik-turmystyq jáne basqa da kómek túrlerin kórsetý. Bul aksııasy aı sońyna deıin jalǵasady. Sondaı-aq, jas belsendiler «Urpaqtar sabaqtastyǵy» atymen belgili jobada aǵa býyn ókilderimen kezdesýler uıymdastyryp, qarııalardyń estelikteri men oqıǵalaryn tyńdap, ózderine kerek keńesterin de alady.
Aıta keteıik, Halyqaralyq qarttar kúni bolyp osydan 28 jyl buryn BUU-nyń Bas Assambleıasynda bekitildi. Alǵashynda Eýropa men Amerıkada toılanyp kelgen mereke ýaqyt óte búkilálemdik deńgeıge ıe boldy. Elimizde qarttar kúni respýblıkalyq deńgeıde jylda atalyp ótiledi.