Qazan aıynyń alǵashqy senbisinde Atyraýda qala kúni toılanady. Bıyl da merekege oraı uıymdastyrylatyn sharalardyń jospary jasaldy. Qala kúni qarsańynda áleýmettik nysandar paıdalanýǵa berilip jatyr. Solardyń biri jedel járdem qyzmetiniń jańa beketi. «Nursaıa» shaǵyn aýdanynda ornalasqan nysan 75 myń adamdy qabyldaýǵa arnalǵan. Shaqyrtýlarǵa segiz jedel járdem brıgadasy shyǵady. Qazirgi zamanǵy qurylǵylarmen jabdyqtalǵan bekette alǵashqy kómek kórsetýden tájirıbelik trenıngter ótetin oqý-jattyǵý bólmesi de bar.
Jańa nysannyń ashylý saltanatyna Atyraý qalasy ákiminiń orynbasary Polymbet Hasanov, oblystyq densaýlyq saqtaý basqarmasynyń basshysy Mánshúk Aımurzıeva qatysty. «Jaqynda «Nursaıa» shaǵyn aýdanynda memleket-jekemenshik áriptestigi aıasynda 12 myń turǵynǵa qyzmet kórsetetin jańa emhana salynady. Oblys ortalyǵynda taǵy da bir jedel járdem beketi, úsh qosalqy beket ashylady, – deıdi Mánshúk Aımurzıeva. Bıyl aýdandarda qosymsha toǵyz beket ashý kózdelýde. Jalpy, eldi mekenderdi jedel járdemmen qamtý kórsetkishi – 91,4%. О́tken jyly avtomattandyrylǵan dıspetcherlik aqparattyq qyzmet kesheni jańartyldy.
Baqytgúl BABASh,
«Egemen Qazaqstan»
ATYRAÝ