Petropavl qalasynyń ákimdigi qala turǵynyn páterinen eriksiz túrde shyǵarý úshin sotqa júginip otyr.
Baspana ıesi bolsa, quqyq qorǵaý organdarynyń tabaldyryǵyn tozdyryp, ózin úıdiń zańdy ıesi ekenin dáleldeı almaı júr. Alǵashqy sot otyrysynda 3 bólmeli baspanany ákimdik balansyna ótkizý týraly sheshim shyǵarylǵan. Basy daýǵa qalǵan azamatsha 1995 jyly Germanııaǵa kóshken otbasynyń páterin satyp alǵanymen, osy kúnge deıin óz atyna rásimdemegen. Jergilikti sheneýnikter baspana ıesiz degen ýájdi alǵa tartyp, kommýnaldyq menshikke almaqshy.
«Petropavl qalasy prokýratýrasynyń usynysymen úsh bólmeli baspana ádilet departamentine ıesiz retinde tirkeldi. Endi sot sheshimimen ákimdik balansyna berilýi tıis», deıdi qarjy bólimi basshysynyń mindetin atqarýshy Elena Bogdan.
Al, zańgerlerdiń pikirinshe jyljymaıtyn múlikti ıesiz dep tabý úshin onyń qojaıyny bolmaýy nemese ol óz múlkinen bas tartýy kerek. Bolmasa jyldar boıy kommýnaldyq tólem, salyq ótelmegen jaǵdaıda ıesiz dep tanýǵa bolady7
Advokat Anna Lesnyhtyń aıtýyna qaraǵanda, onyń qorǵaýyndaǵy azamatsha baspana daýy máselesi boıynsha sotqa osydan bes jyl buryn shaqyrtylyp, páter ıesiniń Germanııada turyp jatqandyǵy, odan eshqandaı shaǵym túspegeni eskerilip, eshqandaı sheshim shyǵarylmaǵan. Endi qala ákimdiginiń eski isti qaıtadan qozǵap, sotqa qaırylýy túsiniksiz.
Páterdiń qazirgi turǵyndary baspananyń burynǵy ıesimen baılanysqa shyǵyp, jyljymaıtyn múlikti rásimdeý jumystaryna kirisken. Sot sheshimin qaıta qaraý týraly appelıasııalyq shaǵym da túsiripti.
О́mir ESQALI,
«Egemen Qazaqstan»
Soltústik Qazaqstan oblysy