«Áleýmettik medısınalyq saqtandyrý qory» kommersııalyq emes aksıonerlik qoǵamy jyl basynan beri halyqqa tegin qyzmet kórsetken medısına uıymdaryna 549,8 mlrd teńge tóledi, dep habarlaıdy qordyń baspasóz qyzmeti.
«8 qazandaǵy málimet boıynsha, qormen kelisimshart bekitken jetkizýshi kompanııalarǵa 549,8 mlrd teńge tólendi. Bul jalpy Tegin medısınalyq kómektiń kepildendirilgen kólemi (TMKKK) paketi sheńberinde bekitilgen kelisimshart somasynyń 70 paıyzyn quraıdy», dedi MSQ basqarma tóraǵasynyń mindetin atqarýshy Botagóz Jaqsylyqova.
TMKKK jáne mindetti áleýmettik medısınalyq saqtandyrý paketteriniń qarjylyq operatory bolyp sanalatyn qor emdeý mekemelerimen TMKKK paketi sheńberinde halyqqa tegin kómek kórsetý jóninde kelisimsharttar bekitken bolatyn. Bekitilgen kelisimsharttardyń jalpy somasy – 785,8 mlrd teńge.
«Jumys kestege saı júrip jatyr. Bólingen qarajat medısına mekemeleriniń operasııalyq shyǵyndaryn óteýge jetkilikti», dedi B.Jaqsylyqova.
Búgingi tańda Qor memlekettik tapsyrys boıynsha 1379 medısına uıymymen kelisimshart bekitken. Onyń 627-si – jeke menshik. Bıyl jeke klınıkalar sany 2017 jylmen salystyrǵanda 166-ǵa kóbeıgen. Al, olarmen bekitilgen kelisimshart somasy 2 esege artyp, 120,2 mlrd teńgeni qurady.