Keshe Qazaqstan Respýblıkasynyń Premer-Mınıstri Baqytjan Saǵyntaev pen Serbııa Respýblıkasynyń Prezıdenti Aleksandr Výchıch «BK Tesla Park» kóp fýnksııaly turǵyn úı kesheniniń bolashaq qurylysy júrgiziletin orynǵa kapsýla saldy, dep habarlady Premer-Mınıstrdiń baspasóz qyzmeti.
B.Saǵyntaev pen A.Výchıch Joldaý mátinin kapsýlaǵa engizip, ony qurylystyń irgetasy qalanatyn jerge birge saldy. Joldaý mátininde «BK Tesla Park» kóp fýnksııaly turǵyn úı keshenin salý eki el arasyndaǵy áriptestik baılanystardy odan ári nyǵaıtýda taǵy bir qadam bolatyny jáne urpaqtardyń esine bir-birine degen ózara syı-qurmetti salatyny atap ótilgen.
«Qazaqstan Respýblıkasy men Serbııa Respýblıkasy turǵyndarynyń arasyndaǵy dostyq bizdiń baýyrlas halyqtarymyzdyń arasyndaǵy san ǵasyrlyq qarym-qatynastar tarıhynyń erekshe betteri bolyp qala beredi», delingen Joldaýda.
Sonymen qatar sharaǵa Astana qalasynyń ákimi B.Sultanov, Qazaqstannyń Serbııadaǵy Tótenshe jáne ókiletti elshisi N.Rústemov, Serbııanyń Qazaqstandaǵy Tótenshe jáne ókiletti elshisi V.Matıch qatysty.
Eske sala keteıik, Serbııa Respýblıkasynyń Prezıdenti Aleksandr Výchıch Astanaǵa Álemdik jáne dástúrli dinder kóshbasshylarynyń VI sezine qatysý úshin resmı saparmen keldi.