Dúnıejúzilik júrek kúni men Dúnıejúzilik tromboz kúnine (13 qazan) oraı Qazaqstandaǵy SANTO kompanııasy júrek-qantamyr aýrýlaryna jurtshylyqtyń nazaryn aýdartý maqsatynda áleýmettik naýqandy bastady.
Kardıolog-dárigerler sońǵy ýaqytta elimizde júrek aýrýlarynyń kórsetkishi geometrııalyq progresspen ósip kele jatqandyqtan, bul derttiń beleń alýyna toqtaý salý úshin tabandy qadamdar jasaý qajetttigin alǵa tartýda.
Kompanııa ótinishi boıynsha, túrli janrda án aıtatyn Qazaqstannyń tanymal úsh oryndaýshysy ózderine beımálim adamdardyń júrek yrǵaǵyna sáıkes kompozısııalar jazyp shyǵardy. Kompozısııa daıyn bolǵan soń ǵana, bul ánder kimniń júreginiń «áýenine» saı jazylǵandyǵy belgili boldy.
Jobaǵa tartylǵan Álı Oqapov bylaı deıdi: «Shynymdy aıtsam, basynda kompozısııany jazý qıynǵa soqty. Birinshiden, áýendi bir mınýtqa syıdyrý qajet. Eń bastysy, mýzykany naqty bir yrǵaqqa keltirý qajet boldy. Sondyqtan áýendi jyldamdata, ne baıaýlata almaısyń. Bul dybystyń ne aıtqysy kelip turǵanyn barynsha sezinýge tyrystym. Nátıjesinde mýzyka óte tez dúnıege keldi. Bastapqyda bul júrek kimdiki ekenin bilmedim. Maǵan bul kardıolog-dárigerdiń nemese kaskaderdiń nemese ananyń júreginiń yrǵaǵy bolýy múmkin dep qana aıtty. Men sol yrǵaqty tyńdaǵan kezde, júrek dybysy óte tereń, qýatty ári mazasyz bolǵandyqtan, kaskaderdiń júregi dep oılap qaldym. Sóıtsem, ananyń júregi bolyp shyqty. Múmkin bul qyzyq estiletin shyǵar, biraq bul dybysta erekshe bir tylsym kúsh bar. Sonyń arqasynda óz sezimderimdi mýzyka arqyly tez jetkize aldym».
Atalmysh jobaǵa ana retinde qatysqan Roza Rymbaeva: «О́z júregime alǵash ret qulaq asqan kezde, onyń óte tereń ári mazasyzdyqqa toly ekendigin sezindim. О́mirimniń sońyna deıin bul dybystyń óte tynysh, birqalypty, meıirimge toly bolǵany qalaımyn. Adamdar óz júregine kóńil bólýi tıis, óıtkeni ol – aǵzamyzdaǵy eń basty múshe. Biz kóbinese qulap súringen kezde ǵana dárigerlerdiń kómegine júginip jatamyz. Jylyna bir márte bolsa da dárigerlerge qaralyp, densaýlyǵymyzdy tekserip turý kerek» deıdi.
Jerebe tartý nátıjesinde JCS tobynyń mýzykanttaryna joǵarǵy sanattaǵy kardıolog-dáriger Qaırat Káribaevtiń júrek yrǵaǵyna sáıkes kompozısııany jazý múmkindigi buıyrdy.
– Júrek yrǵaǵy mýzyka dybysyna qondyrylǵan kezde, óte qyzyqty dúnıeler ómirge keledi eken. Árbir adamda, árbir tiri zatta ártúrli músheniń, mysaly, búırek, baýyr, eń bastysy, júrektiń óz bıoyrǵaǵy bolady. Biz júrekke únemi qulaq aspasaq ta, bizdiń búkil ómirimiz onyń yrǵaǵyna kónedi, osyny esten shyǵarmaǵanymyz abzal, – deıdi dáriger Qaırat Rahmanıuly.
– Men kúndelikti naýqastarmen jumys jasaımyn. Adamdar aýrý belgilerin ne osteohondroz, ne ókpedegi syrqat dep túsinip, mıokard ınfarktisiniń belgilerin ótkizip alady. Biz udaıy júrek yrǵaǵynyń buzylǵandyǵyna jiti kóńil bólmeımiz. Alaıda júrek – bireý, sondyqtan ony kútý qajet, – deıdi dáriger.
«Sońǵy jyldardaǵy ońdy úrdiske qaramastan, Qazaqstanda qan aınalym jáne júrek-qantamyr aýrýlary jalpy aýrý-syrqattar arasynda kósh bastap, ólim-jitimniń kóptishigi jaǵynan birinshi orynda tur. Tanymal tulǵalardyń qatysýymen túsirilgen áleýmettik rolıkter qazaqstandyqtardyń nazaryn osy máselege aýdartyp, óz densaýlyqtaryna kóńil bólýge, derttiń aldyn alyp, salaýatty ómir saltyn ustanýǵa túrtki salady degen senimdemin», – dedi SANTO kompanııasynyń qoǵammen baılanys jónindegi dırektory Elena Arysheva.
Aınash ESALI,
«Egemen Qazaqstan»
ALMATY