Jambyl atyndaǵy fılarmonııanyń janyndaǵy Nurǵısa Tilendıev atyndaǵy «Otyrar sazy» akademııalyq folklorlyq-etnografııalyq orkestriniń Eýropaǵa jasaǵan týrnesi zor jetistikpen aıaqtaldy.
Fransııanyń ońtústigindegi Monpeldegi Ulttyq opera teatrynda jáne Kann qalasyndaǵy ataqty Mıramar zalynda etnografııalyq orkestr eki birdeı konsert qoıyp, talǵamy da, talaby da kúshti fransýzdardy ulttyq aspaptardyń sazymen tánti etti. «Fransııadaǵy Qazaqstan kúzi» atty baǵdarlama aıasynda ótkizilgen gastroldi Qazaqstannyń Fransııadaǵy elshiligi uıymdastyrǵan. Sondaı-aq, Almaty qalalyq ákimdiginiń ókilderi aýqymdy mádenı sharanyń buǵan qosa Qazaqstan men Fransııa arasyndaǵy strategııalyq yntymaqtastyqtyń 10 jyldyǵyna da arnalyp otyrǵanyn aıtty.
Qazaqtyń mýzykalyq folklorynyń eń ǵajap úlgilerin saqtap qana qoımaı, orkestrdiń saz-áýez múmkindigin jańa yrǵaqtarmen jetildirip, baıytyp otyrǵan «Otyrar sazy» orkestriniń shyǵarmashylyǵymen fransýz jurtshylyǵy alǵash ret jaqynyraq tanystyryldy. «Jahandyq álemdegi zamanaýı qazaq mádenıeti» baǵdarlamasy orkestrdiń ustanymyna tym jaqyn ekeni de naǵyz eýropalyq kórermender qyzyqtaǵan osy keshte anyq ańǵaryldy.
Orkestr qazaq pen fransýzdyń eń belgili áýenderin oryndaǵan kezde bas dırıjer Dınara Tilendıeva zaldaǵy kórermendi qolynyń sıqyrly qozǵalysymen, taıaq ushyna ilingen talantymen baýrap, mýzyka tuńǵıyǵyna qaraı jeteleı tústi. Zalǵa qaıta-qaıta shaqyrylǵan ánshi Farhat Kýbıev bolsa jez tańdaı únimen fransýzdarǵa uzaq-uzaq shapalaq urǵyzdy. Dala dybysy men kóne zamandardyń kúmbirin jetkizý úshin qurylǵan «Otyrar sazynyń» dombyrashylary men qobyzshylary, sazsyrnaıshylary men jetigenshileri birde qustyń saıraǵanyn, birde tulpar tuıaǵynyń dúbirin, birde qasqyrdyń ulyǵanyn, endi birde jeldiń yzyńyn shekti jáne úrmeli saz aspaptarynyń kómeıinen túıdek-túıdek tógiltkende, franýszdar tym alystaǵy beıtanys eldiń tarıhy men taǵdyryn tanyǵandaı kúı keshkenin bir-birine jarysa aıtyp jatty.
Ár konsertten keıin kórermender dırıjerge, ánshiler men uıymdastyrýshylardyń janyna arnaıy kelip, ózderine jańa aspaptardy ǵana emes, jańa ultty jaqyn tanýǵa múmkindik syılaǵandary úshin rahmet aıtyp, Qazaqstanǵa saparlap kelgisi keletinderin aıtqan.
Aıgúl AHANBAIQYZY,
«Egemen Qazaqstan»
ALMATY