Oblys ortalyǵyndaǵy «Qulager» ıppodromynda Ulttyq at sportynyń bıylǵy maýsymy aıaqtaldy. At jarysyna Aqmola, Qaraǵandy, Shyǵys Qazaqstan jáne Pavlodar oblystarynyń shabandozdary qatysty. Alaman báıge 24 shaqyrymǵa, toq báıge 8 shaqyrym, ushqyr báıge 2, 4 shaqyrym qashyqtyqqa arnaldy.
Qalalyq sport jáne dene shynyqtyrý bóliminiń málimetinshe, júldege Ulttyq at sportyna demeýshi kásipkerler 3 avtokólik jáne 2 motosıkl tikken.
Alaman jarystyń qorytyndysynda Baıanaýyldyq Ámir Nyǵmanovtyń «Mýdryı Sokrat» atty aty ushqan qustaı alda keldi. Bapkeri Mıhaıl Jeksenbaev, shabandozy-Vlad Nınashov.
Ekibastuzdyq Mıras Tileýberli, Shyǵys Qazaqstan oblysynyń kelgen Ǵadylbek Serikboldyń júırikteri márege ekinshi jáne úshinshi bolyp jetti. Ushqyr báıgeniń júldesin Bolat Qojamseıittiń «Presanella» jeńip aldy. Qunan jarysy boıynsha, Aqsaqovtyń «Obrıgadasy» márege birinshi jetti. Toq báıgeniń jeńimpazy «Baısary» atalatyn tulpar.
Bul kúni aýdaryspaq oıyndarynan da qyzý báseke dodasy ótti. Oıynnyń jeńimpazdary men júldegerleri aqshalaı syılyqpen marapattaldy. Pavlodarlyq shabandozdar Astanada ótken «Uly Dala rýhy» festıvalinde aýdaryspaqtan ekinshi oryn alypty.
Oblystyq at sporty jarysynyń aǵa jattyqtyrýshysy Jasulan Álıevtiń aıtýynsha, oblysta bıyl 3 ret at báıgesi ótken. Qazir Aıbyn Ýahıtov, Murat Aǵjan, Baǵdat Asqar sııaqty sportshylar kelesi jyly bolatyn at sporty jarystaryna daıyndyqty bastap ketipti.
Farıda BYQAI,
«Egemen Qazaqstan»
PAVLODAR
Sýretti túsirgen : Valerıı Býgaev