Zańǵar jazýshy, kásibı jýrnalıst, memleket jáne qoǵam qaıratkeri Sherhan Murtaza aǵamyzdyń dúnıeden ozǵany týraly habardy zor kúızelispen qabyldadym.
Sheraǵam «Bir kem dúnıe» dep júrip, bes kún fánı jalǵannan kelmestiń kemesine minip, máńgilik mekenge attandy.
Ǵıbratqa toly ǵumyrynda, qazaq rýhanııatynyń damýyna ólsheýsiz úles qosyp, ádebıettiń «Taý tulǵasy» atandy. «Jegeni jantaq, arqalaǵany altyn» dep, tilshiniń tirligin hám bedelin túzep, bekem etti. Shákirt tárbıelep, ózi júrgen dańǵyl jolymen urpaqqa úlgi bola aldy. Onyń jazýshylyǵy men jýrnalıstigi bir tóbe, shymyr sózden uıqas uıytyp, óleń óretin aqyndyǵy bir tóbe edi.
Jambyl óńirinde qyzmet istep júrgenimde, aǵamnyń shańyraǵynda jıi bolyp, dıdarlasyp, keńesip turýshy edim. Erjigittiń qar barysyndaı baıypty minezdi bolǵany – onyń baǵy dep aıtýshy edi maǵan.
Shyntýaıtynda, aǵanyń shyn esimi – Sheri ekenin bireý bilse, bireý bilmes. Aıbaty men qaıraty basym tek ushar bıik, qar basqan shyńda ǵana ómir súretin qazaq barysyna baılanysty qoıylsa kerek.
Eń ókinishtisi, ulttyń dástúri, dili men tiline, jalpy el taǵdyryna qatysty qanatty sózderin, shekpeninen shyqqan sherli dúnıelerin endi baspasózben jazylǵan taspalardan, ózi qattaǵan kitaptardan ǵana kórip oqımyz.
Aǵalyq aqylyńyz, kemel keńesterińiz, oramdy oılaryńyz kókeıimde áli kúnge deıin saırap tur. О́zińizge degen qurmetim men izetim, kún sanap óspek. Saǵynyshqa aınalar jarqyn beıneńiz jadymyzda máńgi saqtalatynyna bek senimdimin.
Baqul bolyńyz, rýhtas aǵa. Jaratqan janyńyzdy nurǵa bólep, mekenińizdi peıishten etsin.
Sheraǵanyń otbasyna, týǵan týystaryna jáne kúlli qazaq rýhanııatyna qaıǵyryp kóńil aıtamyn.
Qanat BOZYMBAEV