Belarýs eliniń astanasy – Mınskide áıgili partızan, Keńes Odaǵynyń batyry Vıktor Lıvensevti eske túsirýge arnalǵan boksshylardyń halyqaralyq týrnıri aıaqtaldy.
Qazaqstannyń boksshylary arasynan osy jarysta Sabyrjan Bekbergenovtyń baǵy jandy. 69 kılo salmaqta óner kórsetken qandasymyz bastapqy básekeleriniń barlyǵynda jeńiske jetip, jartylaı fınalda Italııanyń ókili Vınchenso Arekııany utty. Aqtyq synda ızraıldik Mıroslav Kapýlerdi qapy qaldyrǵan Sabyrjan bas júldeni qanjyǵasyna baılady.
56 kılo salmaqtaǵy Bekzat Maǵjannyń da jeńis tuǵyrynyń eń bıik satysyna kóterilýge jaqsy múmkindigi boldy. Alaıda sheýshi tusta fransııalyq Djordan Rodrıgeske ese jibergen ol kúmis medaldi moınyna ildi. Al 52 kılo salmaq dárejesinde judyryqtasqan Temirtas Júsipov qola júldeni ıelendi. Qazaq boksshysy jartylaı fınalda anglııalyq Ýıll Koýlıge jol berdi.
Mınskidegi týrnırdiń komandalyq esebinde Belarýs quramasy top jardy. Bul eldiń tórt boksshysy jeńimpaz atandy. Anglııa men Grýzııanyń ókilderi eki retten dara shyqsa, Fransııa men Qazaqstannyń órenderine de bas júlde buıyrdy.
Ǵalym SÚLEIMEN,
«Egemen Qazaqstan»