Berik Imashevtyń tóraǵalyǵymen Ortalyq saılaý komıssııasynda Grýzııadaǵy prezıdent saılaýyna Qazaqstannan jiberiletin baıqaýshylar tizimin bekitýge qatysty otyrys ótti.
OSK málimetinshe, Grýzııadaǵy saılaýǵa baıqaýshy retinde elimizden 9 adam resmı tirkelgen. Olardyń ishinde 3 baqylaýshyny Grýzııa OSK arnaıy shaqyrǵan. Baqylaýshylar qataryna OSK-dan, Qazaqstannyń Bas prokýratýrasynan, Joǵarǵy soty men «Nur Otan» saıası partııasynan – 1 kandıdatýradan, Syrtqy ister mınıstrliginen 2 kandıdatýra usynylǵan. Aıta keteıik, OSK 28 qazanda ótetin saılaýdy baqylaýǵa qatysý úshin jeti saıası partııaǵa shaqyrý jibergen, biraq tek «Nur Otan» partııasy óz kandıdatýrasyn usynǵan.
Eskere ketetin jaıt, Qazaqstannan shetelderge jiberiletin baıqaýshylar tizimi OSK qaýlysymen bekitiledi.
Usynylǵandar tizimi resmı bekitilgennen keıin komıssııa múshesi Záýresh Baımoldına baqylaýshylar úshin arnaıy trenıng ótkizdi. Trenıng kezinde olar saılaý naýqanyndaǵy negizgi qujattarmen, standarttarmen tanystyryldy. Ásirese saılaý prosesiniń jáne aldyn ala shyǵarylatyn saılaý nátıjeleriniń erekshelikterine asa kóńil bólindi. Sonymen qatar sheteldegi baqylaýshylar saılaý kezinde ustanýy tıis erejeler tanystyryldy.
Búginde elimiz saılaýdy halyqaralyq deńgeıde baqylaý isine belsene atsalysyp keledi. 2005-2018 jyldar kóleminde halyqaralyq baqylaýshy retinde elimizden shamamen 123 saılaý kampanııasynyń jumysyn baqylaýǵa 1,9 myń ókil jiberilgen.
Qarlyǵash QURAMYS,
«Egemen Qazaqstan»