Túrki keńesiniń Ekonomıka mınıstrleriniń 8-shi kezdesýi, Kyrǵyz Respýblıkasynyń Ekonomıka mınıstri Oleg Pankratov pen Túrki keńesi Bas hatshysy Baǵdad Ámireevtiń qatysýymen, 2018 jyldyń 17 qazanynda Bishkekte uıymdastyryldy.
Túrki keńesiniń múshe memleketteriniń ózara ekonomıkalyq qatynastaryn damytý maqsatynda, atalǵan jıynǵa Ázerbaıjannan Ekonomıka mınıstriniń orynbasary Sahıb Mammadov, Qazaqstannan Ulttyq ekonomıka mınıstriniń orynbasary Madına Júnisbekova, Túrkııadan Ekonomıka mınıstriniń orynbasary Gondja Yshyk Iylmaz Batýr, Túrki keńesine baqylaýshy memleket mártebesine ıe bolǵan Vengrııadan Qyrǵyz Respýblıkasyndaǵy Vengrııanyń Tótenshe jáne О́kiletti Elshisi Andrash Baranı qatysty.
Mınıstrler kezdesýi Mınıstr Pankratov jáne Bas hatshy Ámireevtiń alǵy sózderimen bastady. Mınıstr Pankratov sodan keıin múshe memleketter arasynda yntymaqtastyqty tıimdi túrde júzege asyrý úshin Túrki keńesiniń ekonomıkalyq kún tártibiniń mańyzdylyǵyn atap ótip, sońgy kezdesýden beri Qyrǵyzstanda saýdany odan ári damytý jáne ınvestısııalardy yntalandyrý múmkindikteri týraly aqparat berdi.
Bas hatshy Ámireev, 2018 jyldyń 3 qyrkúıeginde Qyrǵyzstannyń Cholpon-Ata qalasynda ótken Túrki keńesiniń 6-shy sammıtinde Prezıdentterdiń alǵa qoıǵan tapsyrmalaryna sáıkes qoldanystaǵy mehanızmderdi nyǵaıtý, sondaı-aq, Ortaq ınvestısııalyq qor, Túrki saýda úıi jáne Ortaq saýda palatasy sııaqty jańa jobalardy engizý arqyly múshe memleketter arasyndaǵy ekonomıkalyq yntymaqtastyqty odan ári damytý qajettiligine nazar aýdardy.
Ázerbaıjannan Ekonomıka mınıstriniń orynbasary Mammadov aıtqan sózinde, Ázerbaıjannyń saýda jáne ınvestısııalar salasynda yntymaqtastyqty damytý jáne nyǵaıtý, sondaı-aq, baýyrlas elderdiń bıznesmenderi arasyndaǵy qatynastardy damytýyna asa mańyzdy mán beretinin atap ótti.
Ulttyq ekonomıka mınıstriniń orynbasary Júnisbekova ózara saýdany damytý maqsatynda ortaq saýda úılerin qurýdy usyndy jáne mundaı mehanızmniń ózara ınvestısııalardy yntalandyrý, óndirýshiler men klıentter arasyndaǵy saýda qarym-qatynastar deńgeıin kóterý jáne Túrki keńesi múshe memleketteriniń ulttyq ónimderin eksporttaý jóninde tanytýyndaǵy sheshýshi ról atqaratynyna senim bildirdi.
Túrkııa Ekonomıka mınıstriniń orynbasary Iylmaz Batýr, Túrki keńesi múshe memleketteriniń ekonomıkalyq áleýetiniń, eń aldymen, ekonomıkalyq damýdyń eń mańyzdy elementi bolǵan adamı damý men adamı kapıtaldy damytý arqyly jaqsyra túsetinin, jáne osy salady ınvestısııalaý kerek ekenin jetkizdi. Ekonomıkalyq ómirde syrtqy saýda operasııalarynyń ýaqyttyq quny men kóliktiń mańyzyn atap ótken mınıstr orynbasary múshe memleketterdi saýda rásimderin jeńildetý salasynda tyǵyz yntymaqtastyq ornatýǵa shaqyrdy. Iylmaz Batýr, kólik jáne keden salasyndaǵy qatynastardy tereńdetýdiń, múshe memleketter arasyndaǵy taýar aınalymynyń ósýine serpin beredi dep habarlady.
Vengrııanyń ekonomıkalyq áleýeti týraly qysqasha aqparat bargen Elshi Baranı, Vengrııanyń Túrki keńesi múshe memleketterimen jemisti yntymaqtastyqqa daıyn ekendigin atap ótip, Vengrııa Eksımbankiniń alty túrkitildes eldermen saýda jasaý, ekonomıkalaryn ınvestısııalaý jáne ortaq jobalardy bastatý maqsatynda 1,5 mlrd. AQSh dollary kóleminde nesıe jelisin ashqanyn aıtty.
Túrki keńesiniń Bas hatshy orynbasary Omer Kodjaman kezdesý qatysýshylaryna bir kún buryn ótken Ekonomıka jónindegi jumys tobynyń 10-shy otyrysynyń qorytyndysyn usyndy.
«Astana» halyqaralyq qarjy ortalyǵy (AHQO) atqarýshy dırektory Aıdar Qazybaev, múshe memleketterdiń arasynda qarjy naryqtary salasynda yntymaqtastyqty damytý maqsatynda AHQO aıasynda atqarylyp jatqan is-sharalar men ózara is-qımyldyń yqtımal baǵyttary týraly tanystyrylym jasap, múshe memleketterdiń kompanııalary men qarjy mekemelerin AHQO-nyń jobalaryna qatysýǵa shaqyrdy.
Kezdesý sońynda Túrki bıznes júldesiniń marapattaý rásimi ótti. Mınıstr Pankratov pen Bas hatshy Ámireev múshe memleketterdiń ekonomıkalyq qarym-qatynastaryna jasaǵan qundy úlesteri úshin Túrkııanyń munaı korporasııasy (TPAO), «Ordabasy Qus» JShS, «ABADA Treıd» jáne «TANAP» kompanııalarynyń ókilderine Túrki bıznes júldesin berdi.
Kezdesýden keıin Mınıstr Pankratov pen Bas hatshy Ámireev otyrystyń qorytyndysy boıynsha buqaralyq aqparat quraldarynyń ókilderi úshin brıfıng ótkizdi.
Atalǵan kezdesýge Bas hatshy orynbasary Omer Kodjaman, Joba dırektorlary Asan Májıtov, Jyldyz Ýzakova, Ozge Pan, Farrýh Jýmaev jáne Zertterý sarapshysy Dastan Álmen de qatysty.