Búgin Parlament Senatynyń Tóraǵasy Qasym-Jomart Toqaev jumys saparymen Qaraǵandyǵa keldi. Oblys aktıvi men jurtshylyq ókilderimen kezdesýde Q. Toqaev Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn iske asyrýdaǵy basty mindetterge toqtaldy.
Senat Tóraǵasy xalyqtyń ál-aýqatyn arttyrý – memlekettik organdar men kompanııalar jumysyndaǵy basym baǵyt bolý kerektigin atap ótti.
– Jańa sapaly kórsetkishterge qol jetkizý úshin biz kóp jumys isteýimiz kerek. Jetistikterge toqmeıilsimeı, kózboıaýshylyqpen aınalyspaı, tek qana eńbek etýimiz kerek, – dep málimdedi Q.Toqaev.
Sonymen qatar, Senat Tóraǵasy kezdesý barysynda áleýmettik mańyzdy jobalardy jyldam jáne nátıjeli júzege asyrý úshin únemdilikke umtylý kerektigin aıtyp, joǵary laýazymdy sheneýnikterdiń ádepten ozbaýy, kásipkerlerge qolaıly klımat týdyrý jáne ekologııa máseleleri týrasynda óziniń oı-tujyrymyn bildirdi.
Kezdesý sońynda Senat Tóraǵasy óńirdiń áleýmettik-ekonomıkalyq damýyna qosqan úlesi úshin oblystyq máslıhat depýtattary Ǵ.Jarylǵapov pen T.Tilemisovke, Abaı aýdandyq máslıhatynyń hatshysy B.Saıǵa, Qaraǵandy memlekettik medısınalyq ýnıversıtetiniń kafedra meńgerýshisi Q.Shákeevke jáne №38 gımnazııanyń qazaq tili jáne ádebıeti pániniń muǵalimi E.Kelmaǵambetovaǵa qurmet gramotalaryn tabys etti.
Budan keıin Qasym-Jomart Toqaev E.Bóketov atyndaǵy QarMÝ-dyń stýdentterimen jáne oqytýshy-professorlyq quramymen kezdesti. Memleket-jekemenshik áriptestik jelisi boıynsha ashylǵan «Lých» neıroońaltý ortalyǵynda, «KazPlast» JShS-iniń zaýytynda jáne basqa da nysandarda bolyp, kásiporyndardyń tynys-tirshiligimen tanysty.
Qaırat ÁBILDA,
«Egemen Qazaqstan»
QARAǴANDY