Sheteldik maman Aqtaýǵa Mańǵystaý oblysy kásipkerler palatasynyń shaqyrtýymen keldi. «Bıznestiń jol kartasy-2020» baǵdarlamasy ekonomıkanyń basymdyqqa ıe salalarynda jumys istep turǵan kásiporyndarǵa bilikti maman shaqyryp, jańa tehnologııalardy engizý boıynsha keńes alyp, biliktilikterin kóterýge múmkindik beredi.
Mundaı jaǵdaıda tetel mamanynyń qyzmeti men jol shyǵyny memleket esebinen tólenedi. Al sarapshydan tájirıbe alatyn kásiporyn mamandy jatyn oryn, tamaqtaný, aýdarmashymen qamtamasyz etedi.
Túrkııalyq maman Aqtaý qalasyndaǵy «Bereket-F» JShS-niń sút zaýytynda boldy. Endi «Aqnek» tańbasymen shyǵarylatyn otandyq ónimder jańasha dámge ıe bolmaq.
Túrik tehnology Iasın Akbaba - sút ónimderin daıyndaý salasynda 20 jyldan astam tájirıbesi bar bilikti maman. Osyǵan deıin Ýkraına, Bolgarııa, Túrkııa syndy elderde mol tájirıbesimen bólisip júr. Aqtaýdaǵy 10 kúndik saparynda sút ónimderiniń tyń reseptimen bólisý, jańadan bastalǵan kásipti órkendetý, kásiporyndy basqarý ádisin úıretý, zamanaýı quraldary satyp alý, qondyrý tásilderin meńgertý, sút ónimderiniń san túri boıynsha bıznes-keńes, marketıng pen sapany baqylaý barysyn ıgertý- negizgi maqsat.
-Eń dámdi sút óniminiń daıyndalý tásilderin bilemin. Bul joly syr, irimshik, ıogýrtty túrik ádisimen ázirleýdi úıretip jatyrmyn. Mańǵystaýlyq mamandar aıtqandy yntamen oryndap júr. Qazir álemdik óndiris ozyq tehnologııaǵa aýysyp barady. Zaýyttardy zaman talabynan qalmaı jetildirip otyrý ónimniń sapaly bolyp, básekege qabilettiligin arttyrady, deıdi Iasın Akbaba.
Tehnıkanyń tilin meńgergen Iasın kópten beri tilin bilmegendikten iske qosylmaı kelgen sút zaýytynyń jańa keshenin iske qosyp bermek. Sheberdiń kelýimen jańa quraldar paıdaǵa asty. Tipti ónimniń jasalý merzimin tańbalaıtyn mór qurylǵysy jóndeldi. Sóıtip, ol kásiporynnyń biraz sharýasyn shıratty.
-Kásipkerler palatasy osymen 3 jyl qatarynan shetel mamandarynan úırený tájirıbesin qoldap keledi. Bıylǵy jyldyń basynan beri Mańǵystaý oblysyna bilikti 4 maman keldi. Olar týrızm, dámhana, aıaq-kıim óndirisi men sút ónimderi salalarynyń damýyna yqpal etti. Jergilikti mamandardyń biliktiligi artty, deıdi О́ńirlik kásipkerler palatasynyń 1-sanatty sarapshysy Murat Toqsanbaev.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy