Taldyqorǵan qalasynda «ZhetysuTravel» halyqaralyq týrıstik forýmy ótti. Elimizdiń barlyq aımaǵy men Qytaı, Ispanııa memleketterinen arnaıy ókilder qatysqan jıyn Elbasy Joldaýyndaǵy mindetterdi jáne sıfrlandyrý baǵdarlamasyn júzege asyrý maqsatynda uıymdastyryldy.
Forým aıasynda Almaty oblysyndaǵy týrızimdi damytý maqsatynda ashylǵan Zhetysu Travel ortalyǵynyń tusaýkeseri jasalyp, ulttyq taǵamdardyń «Toı qazan» VI festıvali de kelýshilier nazaryna usynyldy.
- Memleket basshysy jaqynda jarııalanǵan Joldaýynda syrttan keletin jáne ishki týrızmdi damytýǵa erekshe kóńil bólýdi jáne salalyq memlekettik baǵdarlama qabyldaýdy tapsyrǵan bolatyn. Osy rette memlekettik baǵdarlama jobasyna Alakól kóliniń jaǵalaýy, Ile Alataýynyń taý klasteri, Sharyn shatqaly sııaqty oblystyń iri týrıstik rekreasııalyq aýmaqtaryn damytý baǵytyndaǵy usynystar engizilip, josparlary ázirlenip jatyr, - dedi forýmda sóz alǵan oblys ákiminiń birinshi orynbasary Lazzat Turlashov.
Sondaı-aq, halyqaralyq sharaǵa arnaıy kelgen Qytaı Halyq Respýblıkasy Mádenıet jáne týrızm mınıstrliginiń Orta Azııadaǵy ókili Van Shýlın Jetisý óńiriniń týrıstik tartymdylyǵy álemniń nazaryn aýdaryp otyrǵanyn, óz jerlesteriniń de jyl saıyn munda kelip demalýǵa yntaly ekenin aıtsa, Qazaqstan Týrıstik qaýymdastyǵynyń atqarýshy dırektory, Qazaqstandyq qonaq úıler men meıramhanalar qaýymdastyǵynyń prezıdenti Rashıda Shaıkenova otandyq týrızmniń áleýeti men qyzmet kórsetý salasyndaǵy máselelerdi sóz etti.
- Halyqaralyq týrızm naryǵynda báseke qabiletti bolý úshin biz eń aldymen bul salada baı tarıhymyzdy, mádenıetimiz ben saltymyzdy pash ete bilýimiz kerek, - dedi Rashıda Shaıkenova óz sózinde.
Munan bólek maman salany sıfrlandyrýdyń múmkindikterine toqtaldy. Onyń aıtynsha búginde otandyq týrıstik nysandardyń tek 17 prosenti ǵana óz qyzmetterin jarnamalaý men satý kanaly retinde ınternet pen áleýmettik jelini paıdalanyp otyrǵan kórinedi.
Jalpy, týrıstik áleýetti arttyrý baǵytyndaǵy halyqaralyq sharanyń Taldyqorǵanda ótkizilýi tegin emes. Qazir oblys týrızmniń tabystylyǵy jóninen elimiz boıynsha alǵashqy orynda. Jalpy, Almaty oblysyna keletin týrıster qatary maýsym saıyn kóbeıip keledi, derek boıynsha ol lek jylyna 20-30 prosentke kóbeıý ústinde eken. Mysalǵa, osy jyly Jetisýdyń ásem tabıǵatyn tamashalap men jaǵajaı aýmaǵyndaǵy demalys oryndaryna kelgen týrıster sany 2 mln adamǵa jetken. Al esep boıynsha Almaty oblysyna týrızmniń damýynan túsken qarjy 10 mlrd teńge shamasynda bolmaq.
Qalmahanbet MUQAMETQALI,
«Egemen Qazaqstan»
Almaty oblysy