Memleket basshysy N.Á.Nazarbaevtyń 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna arnaǵan Joldaýynda buqaralyq sport pen dene shynyqtyrýdyń qoljetimdiligin arttyrý, salaýatty ómir saltyn qalyptastyrý baǵytynda naqty tapsyrmalar júktelgen bolatyn.
Budan basqa, Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigimen bekitilgen Memlekettik qyzmettegi ádeptilik deńgeıin kóterýge baǵyttalǵan Keshendi josparǵa sáıkes, memlekettik qyzmetshilerdiń aqysyz sport nysandarymen qamtylýyn qamtamasyz etý kózdelgen.
Osy oraıda, Qazaqstan respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti men Munaıly aýdany ákimi apparaty jáne oǵan qarasty derbes memlekettik mekeme qyzmetkerleriniń arasynda «Adal jol» baǵdarlamasyn júzege asyrý maqsatynda sporttyq is-sharalar ótkizildi.
Sporttyq is-sharany Munaıly aýdanynyń ákimi N.Tájibaev pen aýmaqtyq departament basshysy, Ádep jónindegi keńestiń tóraıymy N.Jannazarova ashyp, memlekettik qyzmetshilerdi adal bolýǵa, salaýatty ómir saltyn ustanýǵa, sportpen belsendi aınalysýǵa shaqyrdy.
Joldastyq kezdesý shaǵyn fýtbol, voleıbol, shahmat, doıby, ústel tennısi, qol kúresinen ótti.
Voleıbol men shaǵyn fýtbol oıynynan Munaıly aýdany basym tússe, sporttyń basqa túrlerinen aýmaqtyq departament qyzmetkerleri júldeli oryndarǵa ıe boldy. Atap aıtqanda, shahmattan 2-shi oryndy basqarma basshysy N.Doldashev, qol kúresinen 1-shi oryndy bas maman E.Sısenalıev jáne ústel tennısinen 1-shi oryndy jetekshi mamany H.Atadýsov ıelendi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy