Jýyrda ǵana Jambyl oblysynyń ákimi Asqar Myrzahmetovtiń bastamasymen Taraz qalasynyń ortalyǵyndaǵy Qaırat Rysqulbekov saıabaǵy men saıabaq ishindegi batyrdyń eskertkishin qaıta jańǵyrtýdan ótkizý jumysy bastalǵan bolatyn.
Az ǵana ýaqyttyń ishinde bul saıabaq adam tanymastaı ózgerip, jańasha sıpat aldy. Búgingi qala kúni merekesi qarsańynda Halyq qaharmany Qaırat Rysqulbekov atyndaǵy saıabaq el ıgiligine berildi. Bul kúni birtýar perzentiniń rýhymen qaıta qaýyshqan kópshilik saıabaqqa kóptep jınaldy. Naqaqtan shahıt ketken batyrdyń rýhyna taǵzym etip, qaharmannyń qaıta jańǵyrtylǵan eskertkishine gúl shoqtaryn qoıdy.
Jıyn barysynda jazýshy, Jambyl oblysynyń Qurmetti azamaty Elen Álimjan, «Patrıottyq qozǵalys «Jeltoqsan aqıqaty» respýblıkalyq qoǵamdyq birlestiginiń múshesi Murat Berdalıev jáne Qaırat Rysqulbekovtiń ápkesi Gúlnár Rysqulbekova sóz sóılep, Qaırattaı qaıratty erdiń ómir jolyndaǵy erlik sátterine toqtaldy. Jeltoqsan oqıǵasynyń naqaq qurbanyna aınalyp kete barǵan batyr týraly estelikter aıtyldy.
Qaırat Rysqulbekov eskertkishiniń ashylý saltanatynan soń qonaqtar saıabaq ishinen ashylǵan «Jeltoqsan-86» ortalyǵynda boldy. Qala qonaqtary men turǵyndary qaıta jańǵyrtýdan ótken Qaırat Rysqulbekov saıabaǵyn tamashalady. Búginde saıabaqtyń jalpy aýmaǵy alty jarym gektardy quraıdy. Jalpy smetalyq quny 403,9 mıllıon teńgeni quraıtyn saıabaqtyń eskızdik jobasyn «Tabys joba» jaýapkershiligi shekteýli seriktestigi ázirlegen.
Saıabaqtaǵy Qaırat Rysqulbekov eskertkishiniń ózi nazar aýdararlyq. Qaımyqpaı jalynǵa qarsy júgirgen batyr beınesi kópshilikti tebirentpeı qoımasy anyq. Al saıabaq kireberisinde jazylǵan Baýyrjan Momyshuly, Sherhan Murtaza, Muhtar Shahanov, Qaırat Rysqulbekov sııaqty alyp tulǵalardyń naqyl sózderi de elimizdiń uly muratyn aıǵaqtap turǵandaı. Sonymen qatar, búgin atalǵan saıabaq ishinen «Jeltoqsan-86» ortalyǵy, «Táýelsizdik ushqyny» alleıasy, qaıta jańǵyrtýdan ótken «Ardagerler úıi», «Ǵıbrat» ortalyǵy jáne «Shahmat» alańy ashylyp, el ıgiligine berildi. Budan bylaı tarazdyqtar men qala qonaqtary Qaırat Rysqulbekov saıabaǵyna kelip, osyndaı keremetterdi tamashalaı alady.
Hamıt ESAMAN,
«Egemen Qazaqstan»
Jambyl oblysy