Temirtaý – Tuńǵysh Prezıdentimizdiń sharbolattaı shyńdalyp shyǵýyna súbeli úles qosqan shahar, Elbasynyń eńbek Otany deýge turarlyq qutty meken. Sol sebepten bolar, metallýrgter qalasynyń jaı-kúıi, ondaǵy turǵyndardyń turmys-tirshiligi Memleket basshysynyń udaıy nazarynda júredi. Qaraǵandy oblysyna kelgen árbir saparynda Nursultan Nazarbaev Temirtaýǵa mindetti túrde soǵady. Bul – ózin eńbekpen eseıtken, saıası ómirdiń sahnasyna joldama bergen qalaǵa degen eren qurmettiń belgisi bolsa kerek.
Eńbek Otany – Elbasy nazarynda
Memleket basshysy bıyl da osy ádetinen jańylǵan joq. Qyrkúıek aıynda oblysqa jumys saparymen kelgeninde Temirtaýǵa arnaıy baryp, ondaǵy áleýmettik-ekonomıkalyq jaǵdaımen jete tanysyp, qala ákimdigine, júıe qurýshy alpaýyt kásiporyn – «ArselorMıttal Temirtaý» AQ-tyń basshylaryna birqatar mańyzdy tapsyrmalar bergen bolatyn. Bıznestiń áleýmettik jaýapkershiligin eske salyp, qala turǵyndary ómiriniń sapasyn jaqsartý maqsatynda qoldan kelgenniń bárin jasaý kerektigin shegelep aıtqan edi. Prezıdent qaladaǵy medısınalyq, bilim berý jáne sporttyq nysandar sanyn arttyrý qajettigin tapsyrǵan.
Al sol sapardan bir kún buryn Qaraǵandyda oblys aktıvimen ótken kezdesý barysynda «ArselorMıttal Temirtaý» AQ-tyń bas dırektory Paramjıt Kalondy ornynan turǵyzyp, Temirtaýdaǵy jylý elektr ortalyǵyn jańǵyrtýdy qatań túrde talap etken bolatyn.
– Bul stansany 1960 jyly men salǵan bolatynmyn. Ol qala men kombınatty jylýmen qamtamasyz etip otyr. Mıttal myrzaǵa jetkizińizder, oǵan Úkimetten telefon soǵady, ol meniń suraqtaryma jaýap bersin. Búkil qala kombınatqa qarap tur, ol búkil qalany jylýmen, sýmen qamtamasyz etip otyr. Ony mindetti túrde jańǵyrtý kerek, – degen edi sonda Memleket basshysy.
Qazirgi tańda Elbasynyń tapsyrmasyna saı, alpaýyt kásiporyn eki JEO-ny jańǵyrtý boıynsha 2023 jylǵa deıin eseptelgen jospar jasap, qajetti qaǵazdardy, atap aıtqanda, jobalyq-smetalyq qujattamalardy ázirlep jatyr. Jospar boıynsha, úsh qazandyqqa tapsyrys berilip, olar 2019 jyldyń naýryz aıynda jetkiziletin bolypty. Bul týraly kompanııa basshylyǵy resmı túrde málim etti.
Eńbekaqy 10 paıyzǵa ósedi
Taıaýda «ArselorMıttal Temirtaý» AQ-nyń bas dırektory Paramjıt Kalon kompanııanyń alǵashqylardyń biri bolyp Memleket basshysynyń jalaqyny kóterý týraly bastamasyn qoldaıtyny týraly málimdeme jasady. Iаǵnı, 2019 jyldyń 1 qańtarynan bastap kompanııa qyzmetkerleriniń tarıfteri men jalaqylary 8-10%-ǵa kóteriletin bolady. Sonymen qatar ujymdyq kelisimge sáıkes, kompanııa qyzmetkerleriniń jalaqysy 2018 jyldyń qunsyzdaný deńgeıine saı 50% shamasynda ındeksasııalanbaq.
– Nursultan Nazarbaevtyń óziniń alǵashqy eńbek jolyn metallýrg retinde bizdiń kombınattan bastaǵandyǵyn maqtan tutamyz, – dedi Paramjıt Kalon. – Biz Memleket basshysynyń eń tómengi jalaqyny kóterý jónindegi bastamasyn alǵashqylardyń biri bolyp qoldadyq. Bul sheshim ujymdyq negizde qabyldandy.
Qyzmetkerlerdiń jalaqysyn kóterý «ArselorMıttal Temirtaý» kompanııasynyń barlyq qurylymdyq bólimsheleri men enshiles kompanııalaryn qamtıtyn bolady. Budan ózge 2019 jyldyń 1 toqsanynda kompanııa óziniń óndiristik nátıjelerine qaraı 13-aılyq jalaqy tóleıtin bolady.
Sonymen qatar kompanııa basshysy 2019 jyldyń 1 qańtarynan bastap «ArselorMıttal Temirtaý» AQ-ta zııandy jumys jaǵdaıynda jumys isteıtin qyzmetkerler úshin jańa eń tómengi jalaqy kólemi salalyq koeffısıentti eseptegende 77 myńnan astam teńgeni quraıtyn bolady dep atap ótti.
Temirtaý qalasynyń jaǵdaıyn jaqsartý maqsatyndaǵy jumystardyń tamyryna qan júgire bastaǵany qýantady. Budan buryn habarlaǵanymyzdaı, «ArselorMıttal Temirtaý» syndy qýatty ınvestordyń qarajatyna metallýrgter qalasynda 20 myń adamǵa arnalǵan emhana, 320 oryndyq balabaqsha, 320 adam syıatyn sporttyq nysan boı kótermek. Aıta ketý kerek, atalǵan nysandardyń barlyǵy da jańa zaman talaptaryna saı úlgide salynyp, jabdyqtalatyn bolady.
Oblys ákimi Erlan Qoshanovtyń sózimen aıtqanda, jaqyn arada temirtaýlyqtar metallýrgter qalasy men onyń turǵyndaryna degen Memleket basshysynyń qamqorlyǵyn tolyqqandy sezinetin bolady.
Qaırat ÁBILDA,
«Egemen Qazaqstan»
Qaraǵandy oblysy,
Temirtaý qalasy