Jarma aýdanynyń ortalyǵy – Qalbataý aýylynda aqyn, jazýshy, qoǵam qaıratkeri Tursynhan Ábdirahmanovanyń 90 jyldyǵyna oraı tulǵanyń eńseli eskertkishi boı kóterdi.
Dushpanyma bilemin alasamyn,
Dostaryma bıikpin, tamashamyn.
Aqıqaty qazaqtyń aqyn qyzy,
Qaı tórińe qoısań da jarasamyn, - degen aqynnyń jyr shýmaǵy jazylǵan eskertkishtiń bıiktigi tuǵyrymen qosa alǵanda 6 metrge jýyqtaıdy.
Qoladan quıylǵan týyndynyń avtory - buǵan deıin Abaı aýdanynda Qunanbaı men uly aqynnyń eskertkishterin jasaǵan talantty jas músinshi Nurbol Qalıev. «Ol kisi jastaıynan jetim qalyp, óziniń eńbegimen, ójettiligimen, talantymen bıik belesterdi baǵyndyrǵan tulǵa. Semeıge ózi baryp bilimin shyńdaǵan. Abaı aýdanynda komsomol qatarynda bolǵan. Sol jerde onyń ánshilik qabiletin birinshi baıqaǵan jazýshy Muhtar Áýezov eken. Almatyǵa jetelep ákelgen de - Muhań. Ǵabıt Músirepov bastaǵan ulylar bul kisiniń talantyn baǵalady. Qazaqstannyń Halyq jazýshysy, meniń ustazym Ázilhan Nurshaıyqov aǵamyz ol kisiniń tórt qasıetin - ánshiligin, aqyndyǵyn, ǵalymdyǵyn jáne qaıratkerligin bóle jara aıtýshy edi.
Oljas Súleımenov bastaǵan «Nevada-Semeı» antııadrolyq qozǵalysyna belsene aralasyp, sonaý Sankt-Peterbýrgte qozǵalystyń bólimshesin qurdy. Keıin elimizge shet eldikter kelip, jerimizdiń baılyǵyn tonaı bastaǵan kezde «Sóıle, qalam» degen kitap jazyp, janaıqaıyn jetkizdi. Tutastaı alǵanda, sanaly ǵumyryn halqyna arnaǵan erekshe jan edi. Osy rette Tursynhannyń uly, joqtaýshysy retinde kúlli jazýshylar atynan alashqa aıaýly tulǵanyń esimin umytpaı, ulyqtap jatqan jarmalyq azamattarǵa, aýdan basshysy Nurlan Sydyqovqa shynaıy alǵysymdy bildiremin», - dedi eskertkishtiń ashylýynda sóz alǵan jazýshy, Memlekettik syılyqtyń ıegeri Sábıt Dosanov.
Segiz qyrly, bir syrly tulǵa esimin ulyqtaýǵa arnalǵan mereıtoılyq sharalar odan ári «О́rkendi ólke - mereıli meken» degen ataýmen aýdan kúni aıasynda atalyp ótip, respýblıkalyq ǵylymı-tájirıbelik konferensııamen jalǵasty. Konferensııada ádebıettanýshy - ǵalymdar Serikqazy Qorabaı men Raqymjan Turysbek T.Ábdirahmanovanyń shyǵarmashylyǵy týrasynda baıandama jasady. S.Qorabaı óz sózinde aqynnyń aıaqtalmaı qalǵan 5 tomdyq shyǵarmalar jınaǵy daıyndalyp, shyǵarylsa, Semeı, Almaty jáne Astana qalalaryndaǵy kóshelerge ǵalym esimi berilse degen usynysyn jetkizdi.
Azamat QASYM,
«Egemen Qazaqstan»
Shyǵys Qazaqstan oblysy,
Jarma aýdany,
Qalbataý aýyly
Sýretti túsirgen Jaqsylyq MURATQALI