Altynsarın aýdanyndaǵy «Jaılaý» demalys úıinde «JAS QOSTA: Jiger, Aberoi, Sana» atty aımaqaralyq aqparattyq lageri úsh kún boıy ótedi. Oǵan oblystyń barlyq aımaqtarynan, irgeles Aqtóbe, Aqmola jáne Reseıdiń Omby, Orynbor oblystarynan jastar kóshbasshylary, respýblıkalyq jastar uıymdarynyń jetekshileri keldi. Jastardyń bar qyrynan damýy, jańa jobalardy qolǵa alýy jáne qoǵamdyq-saıası ómirge belsene qatysýyn qamtamasyz etý bul sharanyń basty maqsaty bolyp otyr.
Aqparattyq lagerde 7 seksııa jumys istep jatyr. Oǵan elimizge belgili saıasattanýshylar men blogerler Saıasat Nurbek, Talǵat Qalıev, Berik Ábdiǵalı, О́rken Kenjebek, «Atameken» jobasynyń ákimgeri Aıan Tájibaı, jas kásipkerler Ádil Egemberdıev, Eráli Bilesh, jastar uıymdarynyń jetekshileri Toqtar Bolysov pen Danııar Súndetbaev shaqyryldy.
Seksııalarda qarqyny kúshti báseke men jahandaný zamanynda jastar kezigip otyrǵan mádenı qundylyqtar men muralardy saqtaý, áleýmettik jelilerdegi aǵymdar, bilim alý salasyndaǵy jańa trendter, taǵy da basqa jastar úshin ózekti máseleler ortaǵa salyndy. Olar týraly jastarǵa barynsha aqparattar berildi.
«Bul Qostanaıda tuńǵysh ret osyndaı formatta ótip jatqan aqparattyq lagerde sıfrlandyrý aıasynda bolyp jatqan ózgeristermen jastardy tanystyrýdy maqsat ettim. Sıfrlandyrýǵa baılanysty jańa tehnologııalar, ınternettik buıymdar, túrli uǵymdar ómirge enip jatyr. Solardy jastar qalaı qoldanýy kerek degen másele kún tártibinde tur. Jastar aqparatqa shóldep júredi, sondyqtan osy sekildi sharalar jıi uıymdastyrylýy qajet. Búginde eńbek naryǵy, bilim naryǵy qalaı ózgerýde, jastarǵa neni oqý kerek, qaı baǵytta jumys isteý kerek degen máselelerdi bilgeni óte durys. Ádette Qazaqstannyń soltústigindegi jastar ońtústik jáne batys óńirlerine qaraǵanda samarqaý, belsendiligi bola bermeıtin. Osy joly olardyń belsendiligine kýá bolyp, qýanyp otyrmyz» dedi saıasattanýshy Saıasat Nurbek.
Jastardyń aqparattyq lageri búgin jáne erteń jalǵasady.
Názıra Járimbet,
«Egemen Qazaqstan»
Qostanaı