Qaıyrymdy jandardyń basyn qosyp, istegen ıgi isterin halyqqa jarııa etip, zor iltıpatqa ıe bolǵan «Altyn Júrek» syılyǵy elimizdiń barlyq meıirimdi jandaryn marapattady.
Jyldan-jylǵa jalǵasyn taýyp kele jatqan ulttyq syılyq qaıyrymdylyq salasyna úlesin qosqan barsha meıirbandarǵa, onyń ishinde jeke tulǵalarǵa, uıymdarǵa jáne mekemelerge alǵys aıtýdy óziniń mindeti sanaıdy. Bıyl 12 nomınasııa boıynsha júldegerlerdiń esimi belgili boldy. Marapat ıegerleri - kásipkerler, iri kompanııalar, BAQ ókilderi men qarapaıym turǵyndar.
Mysalǵa «Múgedek jandarǵa kórsetken qamqorlyǵy úshin» nomınasııasynda ALMAU-dyń Áleýmettik Kásipkerlik Ortalyǵynyń dırektory – Nurjan Áljanova jeńimpaz atandy. Bıznestiń qyr-syryn tanıtyn Nurjan hanym, bilim men mansapty damytý arqyly múmkindikteri shekteýli adamdar arasynda áleýmettik teńsizdikti eńserýge baǵyttalǵan jumystar jasaıdy.
«Meniń oıymsha, qaıyrymdylyq degen jaı ǵana daıyn materıaldyq kómek emes. Men múmkindigi shekteýli adamdarǵa ózderiniń bilgenderin jetildirip, jobalary bolsa, olardy jan-jaqty damytýǵa qolǵabys etemin. Bolashaqta olar qoǵamda óz ornyn taýyp, tulǵa retinde qalyptasyp jatsa, odan artyq ne kerek? Qaıyrymdylyqtyń negizgi ıdeıasy sonda jatyr», - dep bólisti Nurjan Áljanova.
Sondaı-aq «Qazaqstannyń órkendeýine qosqan úlesi úshin» nomınasııasynda máskeýlik Olga Batýtına jáne Ilıa Baıgabýlov, «Jetim balalarǵa kórsetken qamqorlyǵy úshin» Gúlnár Qabylbekova, «Densaýlyq saqtaý salasyna kórsetken qoldaýy úshin Roza Álimhanova jáne t.b bar.
Qaıyrymdylyqty asyl qasıet dep tanıtyn «Baurzhan» qory ókilderiniń aıtýy boıynsha, 5 aı ishinde «Altyn Júrek» syılyǵyna 300-den astam ótinish kelip túsken. Olardyń ishinen ádil-qazylar alqasy tek laıyqty degen júldegerdi tańdaǵan.
«Altyn Júrek» - qaıyrymdylyq jolyndaǵy eń bedeldi marapat. Araǵa 12 jyl ýaqyt salsa da «Baurzhan» qorynyń uıymdastyrýymen ótetin bul joba búginde el nazarynda.
«Qazirgi tańda qoǵamda adamdar arasynda jylýlyq men qamkorlyq sırektep barady. Osy máselelerdi qarastyryp, múmkindigi shekteýli adamdarǵa, qart adamdar men ardagerlerge kómektesip júrgen adamdardy anyqtap alyp, olarǵa qurmet kórsetý, meniń oıymsha, óte durys. «Altyn Júrek» syılyǵy - fılosofııasy men qaǵıdalary jetilgen, adamdar arasynda nasıhattaýǵa turarlyq mán-mańyzy bar úlken joba», - dep syılyqtyń ózektiligi jaıynda Jazýshylar Odaǵy tóraǵasynyń orynbasary Mereke Qulkenov aıtyp ótti.
Adamzat balasyn ıgi isterge ıtermelep, eń bastysy, muqtaj jandarǵa kómek qolyn sozýǵa degen talpynysty shyńdaıtyn «Altyn Júrek» ultttyq syılyǵy mártebesin asqaqtatyp keledi. Oǵan saltanatty rásimdi tamashalaýǵa kelgen myńdaǵan adam kýá boldy.
«Altyn júrek» júldegerleri
«Jetim balalarǵa kórsetken qamqorlyǵy úshin» nomınasııasy boıynsha Gúlnar Qabylbekova
«Bilimdi damytýǵa qosqan úlesi úshin» nomınasııasy boıynsha Asylbek Qojahmetov
«Múmkindigi shekteýli jandarǵa kórsetken qamqorlyǵy úshin» nomınasııasy boıynsha Nurjan Áljanova
«Sportty damytyp, ony qoldaǵany úshin» nomınasııasy boıynsha Arman Mashımov
«Ardagerlerge kórsetken qurmeti úshin» nomınasııasy boıynsha Seıdahmet Qaltaev
«Aqparattyq qoldaýshy» nomınasııasy boıynsha «Bestdoctor.kz» medısınalyq aqparattyq portaly
«Jyldyń qaıyrymdy adamy» nomınasııasy boıynsha Bolat О́temuratov
«Jyl uıymy» nomınasııasy boıynsha «Hareket» qory
«Densaýlyq saqtaý salasyna qoldaý kórsetkeni úshin» nomınasııasy boıynsha Roza Alımhanova
«Qazaqstannyń órkendeýine qosqan úlesi úshin» nomınasııasy boıynsha Olga Batýtına jáne Ilıa Baıgabýlov
«Qorshaǵan ortany qorǵaýǵa qosqan úlesi úshin» nomınasııasy boıynsha «Tazalyq» ekologııalyq jobasy
Jyl mesenaty Sergeı Glýshkov
Elvıra SERIKQYZY,
«Egemen Qazaqstan»
ALMATY