Máskeýge jumys babyndaǵy saparmen kelgen Parlament Senatynyń Tóraǵasy Qasym-Jomart Toqaev Reseı Federasııasy Syrtqy ister mınıstrliginiń Dıplomatııalyq akademııasynda boldy, dep habarlaıdy Senattyń baspasóz qyzmeti.
Oqytýshylar men tyńdaýshylar aldynda sóz alǵan Senat Tóraǵasy Eýrazııanyń geosaıası róli men halyqaralyq arenadaǵy Qazaqstannyń ornyna taldaý jasady.
Q.Toqaevtyń pikirinshe, búgingi tańda jahandyq jáne aımaqtyq qaýipsizdik keskin-kelbetiniń beriktigi eleýli túrde synaqqa túsip otyr. «Biz qyrǵı-qabaq soǵystyń keıbir kórinisteriniń qaıta týyndap otyrǵanyn kórip otyrmyz. Ulttar arasyndaǵy, dinder arasyndaǵy, tipti dinder ishindegi sıpattaǵy teketirester órshı túsýde» - dedi Senat basshysy.
Baıandamashy jahandyq jáne aımaqtyq qaýipsizdikti nyǵaıtý maqsatyndaǵy Qazaqstan qolǵa alǵan qadamdar týraly aıtty. «Astana Eýrazııadaǵy únqatysý men bitimgershiliktiń barshaǵa moıyndalǵan ortalyǵy mártebesine ıe boldy. Prezıdent N. Nazarbaev Ýkraınanyń shyǵysyndaǵy jaǵdaıdy retteýge eleýli kúsh salyp, Reseı men Túrkııa arasyndaǵy qatynastardy qalypqa túsirýde sheshýshi úles qosty. Qazaqstan astanasynda sırııalyq shıelenisterdi retteý jónindegi mazmundy kelissózder ótti», dedi ol.
Q.Toqaev Kaspıı mańy memleketteri basshylarynyń Aqtaýdaǵy sammıtiniń qorytyndylaryna tyńdaýshylardyń nazaryn aýdardy. Onyń aıtýynsha, qol jetken jetistikter sý aıdynynyń quqyqtyq mártebesi jónindegi uzaqqa sozylǵan daýlardy retteýge núkte qoıdy. Bizdiń elimizdiń syrtqy shekarasyn resimdeý úderisterin aıaqtaýda sammıt mańyzdy ról atqardy. «Kaspıı jónindegi Konvensııaǵa qol qoıa otyryp, Qazaqstan qurlyqtaǵy jáne teńizdegi bólikterdi qosa alǵanda, zań júzinde tutastaı rásimdelgen memlekettik shekara syzyǵyna ıe boldy», dedi Senat Tóraǵasy.
Qazaqstandaǵy reformalar týraly aıta kelip, Q.Toqaev Prezıdent N.Nazarbaevtyń taıaýdaǵy Joldaýynyń strategııalyq sıpatyn atap ótti. Bul Joldaý bizdiń azamattarymyzdyń ál-aýqatyn arttyrý men ekonomıkanyń ornyqty ósýin qamtamasyz etý jónindegi birinshi kezektegi mindetterdi sheshýdi kózdeıdi.
Q.Toqaevtyń pikirinshe, Eýrazııanyń keleshektegi beınesin qalyptastyrýda qytaılyq «Bir beldeý, bir jol» megajobasynyń áseri zor bolady. Senat Tóraǵasy «Eýrazııadaǵy yqpaldastyq úrdisteri aımaqtyq jáne jahandyq saýda baılanystaryn damytýǵa jańa serpin bere alady, ol saýdanyń jańa ósý núkteleri men tutastaı ekonomıkany qalyptastyrýǵa múmkindik beredi», dep sanaıdy.
Q.Toqaev yqpaldastyqty óristetý men ózara tıimdi yntymaqtastyqtyń aýqymdy áleýetine ıe Eýrazııalyq Odaqty damytýdyń keleshegine de toqtaldy.
Senat Tóraǵasy Máskeýde Reseı Federaldyq Jınalysynyń qos Palatanyń basshylarymen kezdesti.
Federasııa Keńesiniń Tóraǵasy Valentına Matvıenkomen áńgime aıasynda ekijaqty kún tártibindegi máseleler, onyń ishinde parlamentaralyq baılanystardy damytý taqyryby kóterildi. Senat Tóraǵasynyń pikirinshe, Qazaqstan men Reseıdiń ózara odaqtastyq qarym-qatynastary Eýrazııa qurylyǵyndaǵy turaqtylyqtyń mańyzdy máselesi bolyp tabylady. Áńgime barysynda Qazaqstan men Reseı zań shyǵarý organdary joǵarǵy palatalarynyń depýtattary qatysatyn Yntymaqtastyq jónindegi komıssııanyń qyzmetine joǵary baǵa berildi.
Q.Toqaev V.Matvıenkony Reseıdiń Federaldyq Jınalysy Federasııa Keńesiniń 25 jyldyǵymen quttyqtady. Senat Tóraǵasy depýtattyq korpýstyń jınaǵan tájirıbesi Reseı azamattarynyń ál-aýqaty men ómir turmysynyń deńgeıin arttyrýǵa yqpal etetinine senim bildirdi. Qazaqstan delegasııasynyń basshysy sondaı-aq qyrkúıek aıynda V.Matvıenkonyń qatysýymen Sankt-Peterbýrgte ótken Ekinshi Eýrazııalyq áıelder forýmynyń qorytyndylaryna oń pikir bildirdi.
Senat Tóraǵasynyń Memlekettik Dýmanyń Tóraǵasy Vıacheslav Volodınmen kezdesýi barysynda Qazaqstan men Reseıdiń kópjaqty yntymaqtastyǵynyń túrli máseleleri sóz boldy.
Q.Toqaev Qazaqstan men Reseıdiń halyqaralyq arenadaǵy ózara áriptestik is-qımylynyń mańyzdy rólin atap ótti jáne ol jahandyq ári aımaqtyq saıasattaǵy kóptegen máselelerde eki memlekettiń kózqarastarynyń sáıkestigimen nátıjeli bolyp otyrǵanyn aıtty. Bizdiń parlamentterge qatysty alǵanda, olar da óz kúsh-jigerin, onyń ishinde kóptarapty qurylymdar aıasynda da úılestirip otyrady. «TMD Parlamentaralyq Assambleıasy men UQShU Parlamenttik Assambleıasy parlamenttik yntymaqtastyqtyń mańyzdy baǵyttary bolyp tabylady, bizdiń depýtattarymyz olardyń aıasynda yqpaldastyq birlestikter elderiniń zańnamasyn úılestirý men jaqyndastyrýdy qamtamasyz etip keledi», - dedi Senat Tóraǵasy.