Kúz mezgilin sharýanyń aıy dep beker aıtpaǵan ǵoı. Ásirese qyrkúıek pen qazan dıqan men malshynyń mańdaıy terlep, jıyn-terin, jem-shóptiń qamyn kúıtteıtin kezeńi. Dál osy altyn mezgilde qol qýsyryp otyrǵan sharýa adamyn kórmeısiń. Tipti eńbek adamynyń artyq-aýys áńgimege ýaqyty bola bermeıdi.
Máselen, dańqty sportshy, Eńbek Eri Jaqsylyq Úshkempirov te sondaı qarbalas shaqtan endi ótip, sharýadan qoly qazir bosaǵandaı. Jetisý óńirindegi Jambyl aýdany jáne Balqash aýdanyndaǵy sharýashylyqtarynyń qysqa daıyndyǵy men jumysshylarynyń jaı-kúıin qamdaýmen júrgen kásip ıesimen birneshe márte telefon arqyly sóıleskenimizben, pikirin bilýge ýaqyt tyǵyzdyq etken. Alǵashqyda Memleket basshysynyń Joldaýyna qatysty oıyn aıtýyn suraǵan bolatynbyz. Az-kem únsizdikten soń Eńbek Eri «Joldaýdy efırden tikeleı tyńdap, negizgi baǵyttaryn baǵamdadym. Bıylǵy basymdyq áleýmettiń jaǵdaıyn ońdaýǵa berilipti. Bul ózi naýqanshyldyqpen bitetin is emes. Ári árkim Elbasy júktegen mindetti qalaı atqaratyny jaıly tolǵanyp, múmkindikterin saralap alýy tıis. Myna kúzgi jıyn-terin, mal qystatý qamyn tııanaqtap bolǵan soń bola habaryn berermin...» degen-di Jaqsylyq aǵa. Aıtqandaı-aq, arnaıy ýaqyt bólip habarlasqan Olımpıada chempıony áriden tolǵady.
– Elbasy Joldaýynda «Úkimetke jáne ákimderge kem degende 100 deneshynyqtyrý-saýyqtyrý keshenin salýdy tapsyramyn. Sondaı-aq qoldanystaǵy, ásirese mektepterdegi sport ǵımarattaryn tıimdi paıdalanyp, deneshynyqtyrýmen aınalysý úshin aýlalardy, parkterdi, saıabaqtardy jabdyqtaý qajet» dep meniń kókeıimde júrgen armandy tap basyp, kórsetip beripti. Jalpy, buqaralyq sportty damytý turǵyndar densaýlyǵynyń jaqsarýyna ǵana emes, memlekettegi sport salasynyń jetistikke jetýine jol ashady. Prezıdent bul jerde ulttyń densaýlyǵyn óskeleń urpaq kezinen saqtaýdy, sol arqyly kásibı sportqa bet buratyn salamatty býynnyń qalyptasýyna qatysty ataly sóz aıtyp otyr. Jáne bul bastama qazirdiń ózinde nátıjesiz emes. Mysalǵa, Almaty oblysynda deneshynyqtyrý-saýyqtyrý keshenin salý isi jaqsy júrip jatyr. Sportshy ári Olımpıada chempıony retinde jeńis dástúriniń úzilmeı jalǵasqanyn qalaısyń. Ol úshin rýhy myqty, densaýlyǵy zor, daıyndyǵy joǵary, sheberligi shyńdalǵan urpaq ósýi tıis. Osy deneshynyqtyrý-saýyqtyrý kesheniniń tabaldyryǵyn ımene attaǵan búgingi jas bala erteń elimizdiń abyroıyn álemdik sport dodasynda qorǵaıtyn sańlaq bolyp óspesine kim kepil? Laıym solaı bolǵaı. Elbasy ákimderge osy dúnıeni jasańdar, halyqqa jaǵdaı jasańdar dep otyr ǵoı.
Men ózim osyǵan qatty qýandym. Qolymyzdan kelgenshe aýylymyzǵa jaǵdaı jasaýǵa tyrysyp jatyrmyz. Jambyl aýdanyndaǵy Myńbaev aýylyn túletýge kúsh salyp júrgenimdi bilesizder. Eńbek Eri atanǵanymda Elbasyna «Nureke, elimizde 5 myń aýyl bar shyǵar, sol aýyldy kóterýge daıyn 5 myń qaltaly azamat shyǵyp, túletip jibersek, Otanymyz gúldenip keter edi. Bir armanym osy...» degen edim. Qazir Elbasyna bergen sol ýádemdi oryndap júrgenime ózimdi baqytty sezinemin, – deıdi J.Úshkempirov.
Dese degendeı, qazir Eńbek Eri týǵan aýyly úshin úlken jumys jasap jatyr. Myńbaev aýylynan birneshe áleýmettik mańyzy bar nysandardy qaıta jóndeýden ótkizip, el ıgiligine berdi. Qaǵıdasynan aınymaǵan chempıon aldymen sport keshenin ashty. Onyń qurylysyna 73 mln teńge qarjy jumsapty. Qazir aýyl jastary bul keshende kúres, boks, aýyr atletıka, fıtnes, fýtbol, voleıbol, grek-rım kúresi, erkin kúres, qazaqsha kúres, sambo, dzıýdo, sol sııaqty fýtbol, basketbol, toǵyzqumalaq sııaqty sport túrlerine jattyǵyp júr. Munan bólek, Myńbaev atyndaǵy orta mekteptiń sport zalyna da kúrdeli jóndeý júrgizip bergen. Taǵy sol sporttyń damýy men sańlaq izbasarlarynyń qamy.
Sporttan bólek, áleýmettiń qamyn da umytqan emes. О́z qarjysyna balabaqsha salyp, oǵan «Jaqsylyq» dep esimin qoıdy. Munda aýyldyń 100 búldirshini tálim alyp jatyr eken. Jas otbasylarǵa arnalǵan jataqhana da bar. 105 áýlet osy shańyraq astynda turyp, eńbek etýde. Kóbi Úshkempirovtyń sharýashylyǵynda jumys isteıdi. Jalaqylary joǵary, turatyn jerinde turmysqa qajetti jaǵdaıdyń bári jasalǵan.
– «Men istedim degenshe, el istedi deseńshi...» degen qazaqtyń sózi bar ǵoı, az-kem eńbegimizdiń óteýin eldiń alǵysymen qaıtaryp jatyrmyz. Bul – azamattyq paryzymyz. «Elde bolsa – eringe tıedi» degen danalyq ta tegin aıtylmaǵan. Elbasy bıylǵy Joldaýynda azamattardy Otanshyl bolýǵa, týǵan jerin túletýge úndep jatyr. Onyń naqty joldaryn kórsetip berdi. Halqymyzdyń ál-aýqatyn arttyrýǵa, turmysyn túzeýge Úkimet bilek sybanyp kirisip jatyr. Prezıdenttiń muǵalimderdiń mártebesin kóterýge, dárigerlerdiń jalaqysyn kóbeıtýge tapsyrma bergeni el ishin súısindirip tastady. О́ıtkeni osy eki mamandyq ókilderi aýyldyń qalypty damýyna úles qosýda. Keshe ǵana ortalyqtan alys eldi mekende boldym. Jurttyń aýzynda Joldaýdyń turǵyndardyń turmysyn jaqsartýǵa degen bastamasy. Endi Memleket basshysy júktegen osy mindetti minsiz atqarýymyz kerek, – dep túıindedi sózin Jaqsylyq aǵa.
Qalmahanbet MUQAMETQALI,
«Egemen Qazaqstan»
Almaty oblysy