Jýyrda aýdandyq ortalyq aýrýhananyń ınsýlt ortalyǵy, sońǵy zamanaýı qurylǵymen jabdyqtalǵan tomografııa kabıneti ashyldy. О́tken jyly 209 medısınalyq apparattar alynsa, bıyl alynatyn jańa jabdyqtar sany odan da arta tústi. Aýrýhanaǵa qarasty 75 medısınalyq emdeý nysandary halyqqa qyzmet kórsetýde. Osy Saryaǵash aýdandyq aýrýhanasynda jumys istep kele jatqanyma 22 jyl bolypty. Iаǵnı densaýlyq saqtaý mekemesi kóz aldymda jyl ótken saıyn jańaryp, qyzmeti jaqsaryp keledi. Aýrýhananyń zaman talabyna saı bolýy, ósip-órkendeýi, árıne Elbasynyń medısına salasyna jasaǵan qoldaýynyń nátıjesi ekeni málim.
Aýdandyq ortalyq aýrýhanada 2121 adam jumys isteıtin bolsa, onyń 307-si dáriger, 1600-i orta jáne kishi býyn medısına qyzmetkerleri. Aıtaıyn degenim, bir ǵana bizdiń aýrýhanadaǵy osynshama qyzmetker Elbasy Joldaýyndaǵy ıgi bastamalar men naqty mindetterdi qyzý qoldaýda, júzege asyrylýyna óz múmkindikteri sheńberinde úles qospaq. Joldaýda jalpy turǵyndardyń ál-aýqatyn kóterýge baǵyttalǵan oń sheshimder kóp. Memleket basshysy adamı kapıtaldyń sapaly ósýine jaǵdaı jasaýǵa erekshe nazar aýdaryp otyr. Bul oraıda bilim berý, ǵylym jáne densaýlyq saqtaý salasyna jumsalatyn shyǵyndardy IJО́-niń 10 paıyzyna deıin jetkizý elimizdiń áleýmettik damýyn anyqtaıtyn negizgi baǵyttarǵa serpin beretini anyq. Búkilhalyqtyq qoldaýǵa ıe bolyp otyrǵan mańyzdy qujatta medısınalyq qyzmet sapasy halyqtyń áleýmettik kóńil kúıiniń asa mańyzdy komponenti bolyp sanalatyny aıtyldy. Sondaı-aq Memleket basshysy «eń aldymen, ásirese aýyldyq jerlerde alǵashqy medısınalyq-sanıtarlyq kómektiń qoljetimdi bolýyn qamtamasyz etý qajettigin» atap ótti. Alǵashqy medısınalyq-sanıtarlyq kómek kórsetetin qyzmetkerlerdi yntalandyrý úshin 2019 jyldyń 1 qańtary-
nan bastap aýrýlardy emdeý isin basqarýdyń jańa tásilderin engizgen ýchaskelik medısına qyzmetkerleriniń jalaqysyn kezeń-kezeńmen 20 paıyzǵa kóbeıtýdi tapsyrdy. Mine, osyndaı qoldaý, yntalandyrý qosymsha kúsh-jiger berip, árbirimizdiń alańsyz jáne minsiz eńbek etýimizge yqpal etip otyr. Dárigerler aýdan turǵyndarynyń densaýlyqtary myqty bolyp, naýqastyń aldyn alý maqsatynda ǵana kómekke júgingenin qalaıdy. Sondaı-aq Elbasy Joldaýlarynda buqaralyq sportty damytý, salamatty ómir saltyn qalyptastyrý arqyly halyqtyń densaýlyǵyn nyǵaıtý qajettigi aıtylyp keledi. Osy jolǵy Joldaýda da sporttyq nysandardyń jastarǵa, balalarǵa qoljetimdi bolýy kerektigi aıtyldy. Bul oraıda dárigerlerimiz kópshilikke úlgi kórsetýde. Aýrýhanada sporttyq jattyǵý jabdyqtary ornatylǵan. Ol jerde aýrýhana qyzmetkerlerimen birge deneshynyqtyrýmen aınalysqysy keletin kez kelgen azamat jattyǵa alady. Dárigerlerimiz túrli sporttyq jarystarǵa qatysyp, jaqsy nátıjelerge qol jetkizýde.
Dárigerlerdiń qaǵazbastylyqtan arylýy da turǵyndarǵa kórsetetin qyzmet sapasyn jaqsarta túsetini anyq. Elbasy Joldaýynda «2019 jyldyń 1 qańtarynan bastap barlyq emhanalar men aýrýhanalar medısınalyq qujattardy qaǵazsyz, sıfrly nusqada júrgizýge kóshýge tıis» delingen bolatyn. Bul qadam dárigerler jumysyn jeńildetýdiń joly ekenine qaǵaz toltyrýdan qutyla bastaǵan bizdiń kózimiz jetip otyr. Árbir tarmaǵy halyqtyń ósýine, tabysynyń artýyna, turmysynyń jaqsara túsýine arnalǵan Joldaýda júktelgen mindetterdiń sapaly oryndalýyna aýrýhana dárigerleri de múddeli.
Ádilbek SÁRSENOV, Saryaǵash aýdandyq ortalyq aýrýhanasynyń revmatolog-dárigeri
Túrkistan oblysy