Qazaqstanda bıyldan bastap jańǵyrmaly energııa kózderin (JEK) irikteý isi aýksıondyq saýda arqyly júrgiziledi. Energetıka vıse-mınıstri Anatolıı Shkarýpa Úkimettiń baspasóz ortalyǵynda ótken brıfıngte onyń qalaı júzege asyp jatqany týraly tolyǵyraq aıtyp berdi.
A.Shkarýpa atap ótkendeı, JEK salasyndaǵy tehnologııalardyń qarqyndy damýy, oǵan qarjy salýǵa nıetti ınvestorlar sanynyń artýy tehnologııalyq sheshimderi tıimdi ári utymdy, shyǵyny az jobalardy tańdaý úshin ádil jáne básekege qabiletti irikteýdi ótkizýde jańa tetikti talap etti.
«Búginde osy talaptarǵa jaýap beretin jahandyq úrdis – jańǵyrmaly energııa kózderin tańdaýdyń aýksıondyq saýda tetigi», dedi vıse-mınıstr. Osyǵan oraı álemdik tájirıbege súıenip, Qazaqstanda da JEK jobalaryn irikteýde aýksıondyq saýda tásili engizilip, JEK salasyn iske qosýǵa múmkindik bergen ári 2018 jylǵa deıin qoldanylyp kelgen belgilengen tarıfterdi almastyrǵan bolatyn.
«Aýksıondyq saýdany engizý úshin biraz jyl daıyndyq jumystary júrgizilip, JEK salasyndaǵy qoldanystaǵy zańnamaǵa birqatar ózgeris engizildi. Jobalardy irikteýde aýksıondyq saýda-sattyqty tıimdi ótkizý úshin Energetıka mınıstrligi múddeli jaqpen birlesip aýksıondyq saýdaǵa ınvestorlardy tartýǵa baǵyttalǵan aýqymdy túsindirý jumystaryn júrgizdi», dedi A.Shkarýpa.
Aýksıondyq saýda «KOREM» AQ-tyń elektrondy saýda alańynda ótkiziledi. Barlyq sharaǵa Baqylaý komıssııasy qatysady. Baqylaý komıssııasynyń quramynda Energetıka mınıstrliginiń, memlekettik organdar men úkimettik emes uıymdardyń ókilderi bar.
Kóktemgi aýksıondyq saýda-sattyq qorytyndysy boıynsha kelesi nátıjelerge súıensek, eki jyl ishinde Almaty jáne Qyzylorda oblystarynda tórt kún elektr stansasy iske qosylady. Úsh jyl ishinde Aqmola, Almaty, Shyǵys Qazaqstan, Soltústik Qazaqstan, Qostanaı jáne Mańǵystaý oblystarynda toǵyz jel, bir bıogazelektrstansasyn salý júzege asyrylady. Tórt jyl ishinde Almaty oblysynda eki sý elektr stansasy iske qosylady.
Bıyl 3-18 qazan aralyǵynda JEK aýksıondarynyń kúzgi sessııasy ótti. Investorlarǵa JEK-tiń barlyq túri usynyldy. Kúzgi aýksıondyq saýda qorytyndysy boıynsha eki jyl ishinde Almaty, Túrkistan, Qyzylorda, Jambyl oblystarynda jáne Shymkent qalasynyń mańynda segiz kún elektr stansasy iske qosylady. Úsh jyl ishinde Aqmola, Almaty, Shyǵys Qazaqstan, Soltústik Qazaqstan jáne Jambyl oblystarynda 400 MVt qýaty bar alty jel elektr stansasy, tórt jyl ishinde Almaty jáne Jambyl oblystarynda úsh sý elektr stansasy paıdalanýǵa beriledi.
Energetıka vıse-mınıstri qatty turmystyq qaldyqtardy, qoqysty qaıta óńdeý boıynsha jumys isteıtin bıoelektrstansalardyń qurylysy máselesin pysyqtaý qajettigin atap ótti.
Suńǵat ÁLIPBAI,
«Egemen Qazaqstan»