Bokstan áıelder arasyndaǵy álem chempıonaty 15-24 qarasha aralyǵynda Úndistannyń Nıý-Delı qalasynda ótetini belgili. 10 márte jalaýy jelbireıtin aıtýly jarysta Qazaqstan quramasy da baq synaıdy.
Ulttyq komandamyzdyń bas bapkeri Vadım Prısıajnıýk Úndistannyń astanasynda myna bylǵary qolǵap sheberlerine senim artyp otyr: 48 kılo – Áıgerim Qasenaeva, 51 kılo – Jaına Shekerbekova, 54 kılo – Dına Jolaman, 57 kılo – Nazym Ishanova, 60 kılo – Karına Ibragımova, 64 kılo – Mılana Safronova, 75 kılo – Aıda Ońdash, 81 kılo – Farıza Sholtaı jáne +81 kılo Lázzat Kúngeıbaeva.
Elimizdiń eń úzdik boksshylary arasynan Rıo Olımpıadasynyń qola júldegeri Darıǵa Shákimova jaraqatyna baılanysty bul jarystan shet qaldy. Azııa oıyndarynan keıin ulttyq qurama bapkerleri álemniń eki dúrkin chempıony Nazym Qyzaıbaıǵa demalys berýdi jón kórgen eken. Sol sekildi Jakartadaǵy jarysqa qatysqan Sánııa Sultanqyzy men Rımma Volosenko da Nıý-Delıdegi dodaǵa barmaıdy.
Esterińizge sala keteıik, osynyń aldyndaǵy álem chempıonaty 2016 jyly Astanada ótken bolatyn. Sol jarysta 4 altyn jáne 2 qola medaldi oljalaǵan Qazaqstan quramasy jalpy komandalyq esepte kósh bastady. Ekinshi jáne úshinshi oryndardy Qytaı (2 altyn+2 kúmis+2 qola) men AQSh-tyń (1 altyn+1kúmis+3 qola) arýlary enshiledi.
Ǵalym SÚLEIMEN,
«Egemen Qazaqstan»