Short-trekten Kanadanyń Kalgarı qalasynda aıaqtalǵan álem kýbogynyń kezeńdik saıysynda Abzal Ájǵalıev kúmis medaldy moınyna ildi.
500 metrlik básekede aqtyq synǵa deıin alqynbaı jetken qandasymyz sheshýshi tusta da asqan sheberlik tanytty. Fınaldyq saıysty 40.136 sekýndtyq kórsetkishpen aıaqtaǵan qandasymyz kúmis medaldy ıelendi. Bul – Qazaqstannyń jańa rekordy! Al bas júldeni Qytaıdyń maqtanyshy, Olımpııa oıyndarynyń jeńimpazy jáne sol jarystyń úsh dúrkin júldegeri, tórt dúrkin álem chempıony Ý Daszın qanjyǵasyna baılady. Qola medal da ataqty sportshyǵa buıyrdy. Onyń ıegeri – Olımpıada, álem jáne Eýropa chempıony vengrııalyq Shaolın Shandor Lıý. Sondaı-aq, Kalgarıdegi jarysta Erkebulan Shamuhanovtyń da jeńis tuǵyryna kóterilýge múmkindigi boldy. Ol fınalǵa joldama alǵanymen, qorytyndy esepte besinshi oryndy qanaǵat tutty.
Álem kýbogynyń kelesi kezeńdik saıysy 9-11 qarasha kúnderi AQSh-tyń Solt-Leık-Sıtı qalasynda ótedi.
Ǵalym SÚLEIMEN,
«Egemen Qazaqstan»