Almatyda «D.V. Sokolskıı atyndaǵy janarmaı, katalız jəne elektrohımııa ınstıtýty» men «Ǵylym qory» AQ birlesken jobasy aıasynda otandyq katalıtıkalyq beıtaraptandyrǵysh sehy iske qosyldy. Jańa ónimdi tanystyrýǵa «D.V. Sokolskıı atyndaǵy janarmaı, katalız jəne elektrohımııa ınstıtýtynyń» Bas dırektory, QR UǴA prezıdenti, akademık Murat Jurynov, «Ǵylym qory» AQ Basqarma tóraǵasy Ánýarbek Sultanǵazın, «Tabıǵat» ekologııalyq odaǵynyń tóraǵasy Mels Eleýsizov, ǵylymı-zertteý ınstıtýttarynyń ǵalymdary qatysty.
Jańa ónimdi tanystyrý barysynda «Ǵylym qory» AQ Basqarma tóraǵasy Ánýarbek Sultanǵazın Ulttyq ǵylym akademııasy ǵalymdaryna úlken alǵysyn bildirip, bir jyldyń úshinde kóptegen jumystardyń atqarylǵandyǵyna toqtaldy. Alǵashqy 8 aıdyń ishinde kommersııalandyrýmen aınalysatyn kásiporyndar óz jobalarynyń paıdasyn kórip otyrǵandyǵyna toqtaldy. Jańa ónim aldaǵy ýaqytta sertıfıkattalatyn bolady.
Búginde qorshaǵan ortanyń avtokólikterden, óndiristerden shyǵatyn ýly gaz qaldyqtarymen lastanýy ǵalamdyq máselege aınaldy. Aýa lastanýynyń apaty jyldan-jylǵa ulǵaıyp barady. Ǵalymdardyń paıymdaýynsha, Almaty elimizdegi qatty gazdanǵan qalalardyń qataryna jatady. Aýaǵa jylyna bólinetin ys pen gaz kólemi 300 tonnany quraıdy. Kólik keptelisiniń saldarynan aýaǵa kóptegen hımııalyq zııandy qaldyqtar bólinedi.
Jobanyń jetekshisi tehnıka ǵylymdarynyń kandıdaty Bolatbek Qusaıynnyń aıtýynsha, osy máselelerdi negizge alǵan otandyq ǵalymdar keńesi bir jyl buryn «Avtokólik jáne ónerkásiptik kásiporyndar gaz shyǵaryndylaryndaǵy ýly komponentterin joıatyn katalıtıkalyq beıtaraptandyrǵyshtardy metaldan óndirýdi uıymdastyrý» jobasyn júzege asyrýdy usynǵan bolatyn. Jobany júzege asyrý úshin elimizdegi birden-bir mamandandyrylǵan, kópjylǵy zertteýler qory bar «D.V. Sokolskıı atyndaǵy janarmaı, katalız jəne elektrohımııa ınstıtýty» tańdalǵan bolatyn. Atalǵan ınstıtýt jáne «Ǵylym qorynyń» mamandary joba aıasynda otandyq katalıtıkalyq beıtaraptandyrǵysh sehyn iske qosty.
Jańa ónim qymbat sheteldik ónimderdi almastyrady. Temirden jasalǵan katalızatorlar keramıkalyq túrine qaraǵanda jyldam qyzady ári tózimdi keledi. Mamandar bul otandyq óndiristegi joǵary serpin ári ekologııalyq tyǵyryqtan shyǵar joldardyń biri, deıdi.
Elvıra SERIKQYZY,
«Egemen Qazaqstan»
ALMATY