Qazaq eli úshin Otyrardyń orny bólek ekeni talas týdyrmasy haq. Onyń tarıhyn tanyp bilýdi, taǵylym alýdy jandandyra túsý maqsatynda búginde aýdandaǵy jas týrıster stansasy, mektepterdegi mýzeılerde kóptiń kóńilinen shyǵatyn jumystar atqarylýda. Oblystaǵy jáne elimizdiń basqa da óńirlerindegi mektepterdiń ótinishterimen oqýshylarǵa Otyrar tarıhyn tanystyratyn tegin ekskýrsııalar uıymdastyryp keledi. Bilim men tárbıe oshaqtaryndaǵy arnaıy ólketaný úıirmelerimen Otyrar memlekettik arheologııalyq qoryq-mýzeıiniń ǵylymı qyzmetkerleri tyǵyz baılanys ornatqan. Jaqynda osy mýzeıde Memleket basshysy N.Nazarbaevtyń bıylǵy Joldaýynda «О́z jerińdi tanyp bil!» jańa bastamasy aıasynda elimizdiń óńirleri boıynsha jappaı mektep týrızmin qaıta jańǵyrtý kerek» degen oı-pikirine qoldaý bildirgen jıyn ótti. Mektep týrızmin jandandyrý oqýshylarymyzdy tarıhı jádigerlerge baı muralarymyzben tanystyrýdan bastalatyny talqylandy. Jıynǵa zııaly qaýym, bilim berý mekemeleriniń ókilderi men mýzeı qyzmetkerleri qatysty. Qoryq-mýzeı basshysy Aıbek Jandosov pen «Nur Otan» partııasy Otyrar aýdandyq fılıaly tóraǵasynyń birinshi orynbasary Abaı Qurman bul jolǵy Joldaýdyń erekshelikterine toqtalyp, halyqtyń tabysyn arttyrýǵa, áleýmettik jaǵdaıyn jaqsartýǵa baǵyttalǵanyn baıandady. Ardager Nurtaza Aldabergenov Joldaýdy nasıhattaý men oǵan úles qosý ár azamattyń mindeti ekenin alǵa tartyp, jurtty jumyla jumys isteýge shaqyrdy. «Rýhymyzdy jigerlendirgen Joldaý» taqybyrynda baıandama jasaǵan Otyrar mýzeıiniń bólim meńgerýshisi Doshan Jumahanuly oqýshylardy tarıhı jádigerlerge toly baı muramen keńinen tanystyrýǵa baǵyttalǵan ujymnyń jumys josparymen bólisti.
– Elbasy Joldaýynda týrızmdi damytýǵa aıryqsha kóńil bólingen. Osy maqsatta týrızmdi damytý jóninde baǵdarlama ázirlenip jatyr. Jyl sońyna deıin týrızm týraly zańǵa ózgerister engizilmekshi. Soǵan saı Otyrar mýzeıiniń ekspozısııasy qaıta jasaqtalyp jańǵyrtyldy. Aýdan ákimi Erlan Aıtahanovtyń usynysymen, mınıstrliktiń qoldaýymen Uly Jibek joly boıyndaǵy tarıhı oryndardy sheteldik týrısterge keńinen nasıhattaý maqsatynda Otyrar qalasynda Sapar ortalyǵy salynbaqshy. Onyń bazasynda mádenı aqparattyq jáne shyǵarmashylyq ınnovasııalar ortalyǵy jumys isteıtin bolady. Mýzeı fýnksııalaryn mádenı aǵartý deńgeıine jetkizip, tarıh ǵylymy, arheologııa, restavrasııa, ónertanýmen ushtastyrýǵa jaǵdaı jasalady. Arheologtarǵa arnalǵan qonaqúıler, zamanaýı tehnologııalarmen jabdyqtalǵan bólmeler, ekspozısııa zaldary salynady. Osynaý oń qadamdar arqyly Elbasynyń «О́z jerińdi tanyp bil!» atty bastamasyn baǵdarsham etip mektep týrızmin qaıta jańǵyrtýǵa kúsh salatyn bolamyz, – deıdi bólim meńgerýshisi D.Jumahanuly.
Ǵalymjan ELShIBAI,
«Egemen Qazaqstan»
Túrkistan oblysy