Almatyda tórt kúnge sozylǵan «Bastaý» stýdenttik fılmderdiń VII halyqaralyq festıvali aıaqtaldy. Qarashanyń 5-8 aralyǵynda qazylar alqasy men kórermender nazaryna Eýropanyń, Azııanyń jáne TMD elderiniń eń jas rejısserleri túsirgen tańdaýly fılmder usynyldy. Bıylǵy «Bastaý» kınofestıvaline álemniń túkpir-túkpirinen 300-den astam usynys kelip túsken. Rejısser Ádilhan Erjanov basqarǵan irikteý komıssııasy baıqaýǵa 22 elden kelgen 47 fılmdi tańdap alǵan bolatyn.
– Bizdiń festıvalimiz bıyl jetinshi ret ótkizilip otyr jáne stýdenttik kıno men kınobiliminiń ózekti máselelerin talqylaıtyn naǵyz kásibı ortaǵa aınaldy. Bizdiń kishkentaı ǵana festıvalimiz qalamyzdyń myńdaǵan stýdentterine, sondaı-aq álemniń túkpir-túkpirinen kelgen jas kınematografısterge paıdaly bolǵanyna senimdimin, – dedi festıvaldyń prezıdenti Sergeı Ázimov.
Kınofestıvaldiń qazylar alqasyna engen grýzın kınorejısseri, ssenarısi, jazýshy ári pedagog Iraklıı Kvırıkadze, reseılik aktrısa Elvıra Bolgova, qyrǵyz kınorejısseri, ssenarıst jáne prodıýser Temirbek Birnazarov, sondaı-aq otandyq rejısser Sábıt Qurmanbekov uzaq talqylaýdan soń «Bastaýdyń» júldelerin bylaısha belgiledi:
Gran-prı reseılik rejısser Adam Dýnaevtyń «Záýre týraly hattaryna», qazylar alqasynyń arnaıy júldesi qazaqstandyq rejısser Danııar Ázimovtiń «Álem adamyna», «Er adam rólin úzdik somdaǵany úshin» júldesi túrkııalyq Ahmed Varlıdiń «Keshegi qaldyq» fılmine, «Áıel adam rólin úzdik somdaǵany úshin» júldesi ózbekstandyq aktrısa Elmıra Rahımjonovaǵa «Ana» fılmi úshin, «Úzdik operatorlyq jumys» júldesi reseılik Vahtang Khýbıtıaǵa «Aıqaı» fılmi úshin, «Úzdik ssenarıı» Ońtústik Koreıadan kelgen Iıe Kımniń «Birge baramyz» derekti fılmi úshin, qazylar alqasynyń arnaıy atalymy Germanııa rejısseri Sıne Koleniń «Ashyq aspandaǵy sımfonııa» fılmi úshin tabystaldy. Al «Otandyq kınematografııaǵa qosqan úlesi jáne Qazaqstannyń jas kınematografısterin ósirgeni úshin» júldesi tanymal rejısser Dárejan О́mirbaevqa berildi. Oraz Ábishev atyndaǵy júlde «Atakásip» derekti fılminiń rejısseri Berik Jahanovqa buıyrdy.
«Bastaýdyń» negizgi qazylar alqasymen qatar Belorýssııa, Qyrǵyzstan, Reseı jáne Qazaqstannyń ókilderi toptastyrylǵan stýdenttik qazylar alqasy da jumys istegen bolatyn. Bul qazylar alqasyn VI halyqaralyq «Bastaý» kınofestıvaliniń bas júldesin jeńip alǵan ıspanııalyq rejısser Iаgo Mateo basqardy. Stýdenttik qazylar alqasynyń Gran-prıin Qazaqstannan qatysqan Álisher Jádigerovtiń «Otaý» fılmine tabystap, erekshe atalymdy sıngapýrlyq rejısser Teng Van Sınniń «Aq qalampyr» kartınasyna berdi.
Aıgúl AHANBAIQYZY,
«Egemen Qazaqstan»
ALMATY