Almaty mýzeıinde elimizdiń ulttyq valıýtasy – teńgeniń 25 jyldyǵyna oraı Qazaqstan Respýblıkasy Prezıdentiniń Arhıvi jáne Almaty qalasy mýzeıler birlestiginiń uıymdastyrýymen «Qazaqstan aýmaǵyndaǵy aqsha aınalymy: kóne zamannan búginge deıin» atty tarıhı-qujattyq kórmesi ashyldy.
Kórmede Prezıdent Arhıviniń qorynda saqtalǵan teńgeni aınalymǵa engizý boıynsha daıyndyq sharalaryna qatysty qujattar, Prezıdent N.Á.Nazarbaevtyń Jarlyqtary, ulttyq valıýtany aınalymǵa engizý boıynsha Memlekettik komıssııa májilisiniń hattamalary, osy másele boıynsha azamattardyń hattary, Elbasynyń estelikteri jáne taǵy basqa biregeı qujattar tuńǵysh ret kópshilik nazaryna usynyldy. Sonymen qatar kórme ekspozısııasyn Otyrar memlekettik arheologııalyq qoryq-mýzeıi men «Áziret Sultan» memlekettik tarıhı-mádenı qoryq-mýzeıi usynǵan Qazaqstan jerinde orta ǵasyrlardan bastap aınalysta bolǵan tıyn-monetalar men ózge de aqsha úlgileri tolyqtyrdy.
Osy aıtýly mereke qarsańynda uıymdastyrylǵan sharaǵa atalǵan mekeme basshylarymen qatar, Almaty qalasy Mádenıet jáne arhıvter basqarmasynyń ókilderi, Almaty qalasynda ornalasqan Ortalyq memlekettik arhıvterdiń basshylary, qarjy jáne bank salasynyń qyzmetkerleri, teńgeniń alǵashqy avtorlarynyń biri Haırolla Ǵabjalılov, Ulttyq bank tóraǵasynyń orynbasary qyzmetin atqarǵan Erlen Jangeldın jáne qoǵam qaıratkerleri qatysty.
Prezıdent Arhıviniń dırektory Jámıla Ábdiqadyrova ulttyq valıýtamyzdy aınalymǵa engizý táýelsiz Qazaqstannyń jylnamasyndaǵy eń mańyzdy oqıǵalardyń biri ekendigine nazar aýdardy.
– Bul elimizdiń táýelsizdigin nyǵaıtý jolyndaǵy túbegeıli áleýmettik-ekonomıkalyq reformalardy júrgizý úshin qajetti tarıhı qadam boldy. Tól teńgemiz paıda bolǵaly júrgizilip kele jatqan memlekettiń tizbekti qarjylyq saıasatynyń arqasynda elimizde naryqtyq ınstıtýttar makroekonomıkalyq turǵydan turaqtalyp, birtindep qalyptasa bastady. Elbasy N.Á.Nazarbaevtyń syndarly saıasatynyń nátıjesinde ózimizdiń aqsha birligimizdi engizý qazirgi kezdegi qol jetken ekonomıkalyq tabystarymyzdyń negizin qalady, – dep atap ótti J.Ábdiqadyrova.
Sonymen qatar shara barysynda teńgeniń 25 jyldyq mereıtoıynyń qarsańynda Prezıdent Arhıvi daıyndaǵan «Ulttyq valıýta tarıhynan» atty qujattar jáne materıaldar jınaǵynyń tusaýkeseri ótti. Jınaqqa KSRO-nyń quldyraýynan keıingi TMD elderindegi, onyń ishindegi Qazaqstandaǵy qarjy salasynyń qıynshylyqtary, som aımaǵynyń joıylý sebepteri, ulttyq valıýtany daıyndaý men engizýdiń uıymdastyrylýy, táýelsiz Qazaqstannyń aqsha-qarjy júıesiniń damýyn baıandaıtyn Prezıdent Arhıvi qorlaryndaǵy biregeı qujattar, atalǵan taqyrypta buqaralyq aqparat quraldarynda jarııalanǵan materıaldar men Elbasynyń estelikteri engizilgen.
Muhammed JYLGELDINOV,
Qazaqstan Respýblıkasy Prezıdent Arhıviniń dırektorynyń kómekshisi,
Ǵalym SÚLEIMEN,
«Egemen Qazaqstan»