Elimizdiń 2018 jyldyń 10 aıyndaǵy áleýmettik-ekonomıkalyq damý qorytyndysyn qarastyrý barysynda Baqytjan Saǵyntaev mınıstrlikter men oblystardyń ákimderiniń nazaryn halyqtyń naqty tabysynyń ósimine taldaý jasaý qajettigine aýdardy, dep habarlaıdy Premer-mınıstrdiń baspasóz qyzmeti.
Memleket basshysy «Qazaqstandyqtardyń ál-aýqatynyń ósýi: tabys pen turmys sapasyn arttyrý» joldaýynda birinshi kezekte halyqtyń tabysyn arttyrý mindetin qoıady.
Otyrysta aıtylyp ótken derekterge sáıkes, ekonomıkanyń túrli salalarynda kórsetkishterdiń ósimi qamtamasyz etilgen. Sonymen qatar, Premer-Mınıstr óńirlerdegi halyqtyń naqty aqshalaı tabysynyń tómengi kórsetkishterin atap ótti. Oryn alǵan jaǵdaıdyń sebepteri men josparlanǵan sharalar týraly Qyzylorda oblysynyń ákimi Q. Kósherbaev, Mańǵystaý oblysynyń ákimi E. Toǵjanov, Almaty qalasynyń ákimi B. Baıbek jáne Almaty oblysy ákiminiń orynbasary L. Turlashov baıandady.
Baıandamalardy tyńdaǵannan keıin, B. Saǵyntaev Eńbek jáne halyqty áleýmettik qorǵaý mınıstrligine, jergilikti atqarýshy organdarǵa elimizdegi halyqtyń tabysynyń tómen bolýy boıynsha qazirgi jaǵdaıǵa taldaý jasaýdy tapsyrdy. Halyq tabysynyń ataýly jáne naqty mánderdegi ósiminiń kórsetkishteri arasyndaǵy aıyrmashylyq týraly sóz qozǵaldy.
Ulttyq ekonomıka mınıstrliginiń derekterine sáıkes, 2018 jylǵy qańtar–tamyzda halyqtyń jan basyna shaqqandaǵy aqshalaı ortasha kirisi 707,9 myń teńgeni qurap, 2017 jyldyń tıisti kezeńimen salystyrǵanda ataýly mánde 10%, naqty mánde 3,5% ósti. II toqsanda halyqtyń naqty kirisiniń ósýi tórt óńirde ortasha respýblıkalyq deńgeıden (4,7%) joǵary ekeni baıqaldy.
Áleýmettik-ekonomıkalyq damý týraly esepterdi ázirlegende birinshi kezekte halyqtyń tabysynyń kórsetkishterine nazar aýdarý tapsyryldy, bul oraıda ákimdikter statıstıkalyq derekterdiń durys emestigin nemese basqa da sebepterdi syltaý qylmaýy tıis. 11 aıdaǵy áleýmettik-ekonomıkalyq damý qorytyndysynyń kelesi qaralýy osy máseleden bastalýy kerek.