«Qazaq tili emlesiniń negizgi erejeleri jobasynyń» praktıkalyq turǵyda meńgerilýin baqylaý maqsatynda QR Mádenıet jáne sport mınıstrligi tarapynan jalpyhalyqtyq dıktant ótkizý týraly usynys túsken bolatyn, dep habarlaıdy Astana qalasy ákimdiginiń resmı saıty.
Osyǵan oraı, Elordada Astana qalasy Tilderdi damytý jáne arhıv isi basqarmasynyń uıymdastyrýymen 14 qarashada saǵat 11:00-de bas qalanyń barlyq joǵarǵy jáne orta arnaýly oqý oryndarynyń, mektepke deıingi mekemelerdiń, mektepterdiń oqýshylary, stýdentteri, ustazdary, sonymen qatar mádenıet, sport, medısına, kommýnaldyq sharýashylyq, energetıka jáne basqa da salalardyń qyzmetkerleri jappaı dıktant jazatyn bolady. Dıktant latyn grafıkasynda jazylady.
Sharaǵa jasy 15-ten asqan barlyq azamattar qatysady. Jalpyhalyqtyq dıktantqa Astana qalasynan 50 000 adamnyń qatysýy josparlanǵan. Dıktant bir kúnde, bir mezette jazylady. Qazirgi ýaqytta dıktant jazý týraly aldyn ala aqparattandyrý jumystary júrgizilip, dıdaktıkalyq materıaldar (Latyn grafıkasyna negizdelgen qazaq tili álipbıi, arnaıy paraqtar) taratylýda.
Bekitilgen dıktant mátini (80-90 sóz) aýdıojazbalar arqyly taratylyp, «Shalqar», «Qazaq» radıolarynan beriledi. Uzaqtyǵy 30 mınýtqa sozylady. Dıktant jazý arnaıy belgilengen oryndarda júrgiziledi.
Arnaıy belgilengen oryndarǵa kelip qatysa almaıtyn tulǵalar úshin dıktantty negizgi uıymdastyrýshylar bergen emle.kz, tilalemi.kz saıttarynyń basty betinde ornalasqan siltememen kompıýter nemese uıaly telefon (smartfon) arqyly kirip, belgilengen ýaqytta dıktant aýdıosyn tyńdaı otyryp jazýǵa múmkindik jasalǵan.
Mundaı tulǵalar dıktantty skanerleý nemese fotoǵa túsirý arqyly tilalemi.kz@gmail.com elektrondyq poshtasyna joldaýy qajet. Sondaı-aq, dıktant aıaqtalǵan soń atalǵan saıtta dıktanttyń durys nusqasy men dıktantty baǵalaý ólshemsharttary shyǵady. Árbir paıdalanýshy jumysyn durys nusqamen salystyra otyryp, ólshemsharttarǵa sáıkes ózin-ózi baǵalaıdy.