Elimizde «Sıfrly Qazaqstan» jol kartasyn júzege asyrý isi qolǵa alynǵan kezde óńirdiń shalǵaı aýyldary men eldi mekenderiniń joǵary jyldamdyqtaǵy ınternet jelisimen qamtylý kórsetkishi kóńil kónshite bermeıtin. Naqty aıtqanda bul kezde onyń deńgeıi 45 paıyzdan asa qoıǵan joq. Az ýaqyttyń ishinde bul derektiń kólemi on paıyzǵa ulǵaıdy.
Qazirgi zamanaýı talaptar men úndes istiń Aqtóbe aımaǵynda ózge óńirlermen salystyra qaraǵanda tómen bolýynyń keıbir obektıtik jáne sýbektıvtik sebepteri de joq emes. Sonyń biri oblys aýmaǵynyń óte keńdigi men aýqymdylyǵy bolyp otyr.
Búgingi kezde óńirde osy olqylyqtyń ornyn toltyrý jóninde naqty is-qımyl jospary belgilengen. Soǵan sáıkes 2020 jylǵa qaraı oblys halqyn joǵary jyldamdyqtaǵy ınternet jelisimen qamtý 75 paıyzǵa jetedi dep kútilýde. Bul jóninde gazet tilshisine «Qazaqtelekom» AQ batys óńirlik telekommýnıkasııa dıreksııasynyń bas dırektory Abaı Qadyralıev aıtyp berdi.
«Sıfrly Qazaqstan» jol kartasynyń tıgizip otyrǵan kómegi men shapaǵaty mol. Iаǵnı onyń aıasy men sheńberinde 250 den astam adam turatyn eldi-mekender men aýyldardy joǵary jyldamdyqtaǵy ınternet jelisine qosý maqsaty kózdelgen. Budan basqa baǵdarlama boıynsha densaýlyq saqtaý, bilim berý salalary men smart city jobasyn bir mezgilde keshendi túrde sıfrlandyrý sharalary qarastyrylǵan.
Tutastaı alǵanda qazirgi kúni oblys boıynsha joǵary jyldamdyqtaǵy ınternet júıesimen qamtý jumystary júıeli jolǵa qoıylǵan. Onyń tıisti nátıjeleri de bar. Aldaǵy maqsat atqarylǵan istiń aýqymyn odan ári arttyra túsý jáne «Sıfrly Qazaqstan» baǵdarlamasynyń der kezinde júzege asyrylýyn qamtamasyz etý bolmaq.
Temir Qusaıyn
«Egemen Qazaqstan»